|
窮人恩物五萬有找 發佈日期 : 2014年 10 月10 日 圖 / 文 : 巴斯
我個人最最最最喜歡的流動播放器 Astell & Kern AK240 推出藍色機身版本， 今次售價只需要 $6000，不過係美元喎 ^^ ，係咪平到離晒大嫂呢? 唔係有錢就一定買到架，因為整個銀河系限量 1000部，賣完就無。 呢個限量紀念版，係 Astell & Kern 與爵士樂 Blue Note合作所推出的產品，慶祝佢老人家今年創立 75 週年喎。
普通一部 AK240 售價為 $2萬 800港元，單單只因為藍色機身而賣 4萬幾港元 ? 當然唔係啦，看圖識字，除了部藍色 AK240外，仲有圖中所見物品一起。
機套 我唔係幾明白，點解有個機套呢?如果我買了，你覺得我會用個機套來套住個藍色機身咩， 我一定買條頸繩陀響心口行耳機或 Hi-Fi 鋪啦，我保証行入每一間店鋪，都有星級招待，呢點我好肯定 ^^ 你睇，個機身就算有色盲的人，都睇到機身上 BLUENOTE 字樣，萬一部機反轉背，都一樣見到字樣， 所以點可能用個機套來套住部機呢? 不過......萬一對方同時文盲又色盲，就真係認唔出架喇。
附件 附件仲有本好精美而且厚達100頁 BlueNote書， 拿~~~來到最值錢附件喇，就係圖中所見 75張 Blue Note 24bit ( 24Bit/192kHz 與 24Bit/96kHz ) 專輯， 配埋個設計獨持CD架一起，你話開心唔開心先，個架同樣有紀念字樣的。
你睇 75張 Blue Note 專輯，依次序擺放上架，同樣有字樣出現，唔需行埋去，離遠就見到，巴閉到呢。 所以話，Hi-Fi 唔只用來聽，仲要用來睇囉。
每個CD盒裡面，都有一張 MicroSD Card ，內裡當然是收錄了( 24Bit/192kHz 與 24Bit/96kHz ) 高清音樂檔案吧。 買得起呢套紀念版的客人，非富則貴，唔通叫佢自己一張一張Card咁換來聽咩， 更無可能叫用家自己全數一張一張 Card 抄落機掛，人家秒秒鐘幾十萬上落，淪落到抄歌先有得聽? 無野下化? 所以呢點可以放心，咁尊貴的客人，有專人一早代勞，把 75 張專輯所有歌曲，殖入 AK240 Blue Note 特別版體內。 用家即買即聽，係咪好想擁有呢? 所以呢個紀念版係包括埋 75 張專輯費用， 咁你依家係咪覺得呢個紀念版套裝，平到離晒大嫂呢? 係就快落訂喇，全球只得 1千套，手快有，跟我讀一次~~~~~ 全球只得 1千套。 有傳下星期香港代理到貨，港幣 5萬有找 ( 50張一仟元紙幣 ) ^^
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。 |
