|
穷人恩物五万有找 发布日期 : 2014年 10 月10 日 图 / 文 : 巴斯
我个人最最最最喜欢的流动播放器 Astell & Kern AK240 推出蓝色机身版本， 今次售价只需要 $6000，不过系美元喎 ^^ ，系咪平到离晒大嫂呢? 唔系有钱就一定买到架，因为整个银河系限量 1000部，卖完就无。 呢个限量纪念版，系 Astell & Kern 与爵士乐 Blue Note合作所推出的产品，庆祝佢老人家今年创立 75 周年喎。
普通一部 AK240 售价为 $2万 800港元，单单只因为蓝色机身而卖 4万几港元 ? 当然唔系啦，看图识字，除了部蓝色 AK240外，仲有图中所见物品一起。
机套 我唔系几明白，点解有个机套呢?如果我买了，你觉得我会用个机套来套住个蓝色机身咩， 我一定买条颈绳陀响心口行耳机或 Hi-Fi 铺啦，我保证行入每一间店铺，都有星级招待，呢点我好肯定 ^^ 你睇，个机身就算有色盲的人，都睇到机身上 BLUENOTE 字样，万一部机反转背，都一样见到字样， 所以点可能用个机套来套住部机呢? 不过......万一对方同时文盲又色盲，就真系认唔出架喇。
附件 附件仲有本好精美而且厚达100页 BlueNote书， 拿~~~来到最值钱附件喇，就系图中所见 75张 Blue Note 24bit ( 24Bit/192kHz 与 24Bit/96kHz ) 专辑， 配埋个设计独持CD架一起，你话开心唔开心先，个架同样有纪念字样的。
你睇 75张 Blue Note 专辑，依次序摆放上架，同样有字样出现，唔需行埋去，离远就见到，巴闭到呢。 所以话，Hi-Fi 唔只用来听，仲要用来睇啰。
每个CD盒里面，都有一张 MicroSD Card ，内里当然是收录了( 24Bit/192kHz 与 24Bit/96kHz ) 高清音乐档案吧。 买得起呢套纪念版的客人，非富则贵，唔通叫佢自己一张一张Card咁换来听咩， 更无可能叫用家自己全数一张一张 Card 抄落机挂，人家秒秒钟几十万上落，沦落到抄歌先有得听? 无野下化? 所以呢点可以放心，咁尊贵的客人，有专人一早代劳，把 75 张专辑所有歌曲，殖入 AK240 Blue Note 特别版体内。 用家即买即听，系咪好想拥有呢? 所以呢个纪念版系包括埋 75 张专辑费用， 咁你依家系咪觉得呢个纪念版套装，平到离晒大嫂呢? 系就快落订喇，全球只得 1千套，手快有，跟我读一次~~~~~ 全球只得 1千套。 有传下星期香港代理到货，港币 5万有找 ( 50张一仟元纸币 ) ^^
各师兄与朋友，这篇文章，如非商业用途，欢迎转贴再转贴，如需借图片使用， ◆ avbuzz.com精神，人人毒我，我毒人人 ◆ 谢谢收看这篇文章，你是第 个收看这篇文章的读者。 |
