|
二手荀貨 發佈日期 : 2013年 3月25日 圖 / 文 : 巴斯
新宿區共有四間 BOOK OFF 二手店，平日多數去渋谷分店，貪地方大小小，而且地庫有二手錶和古著可以找到。 今次試下來 新宿駅東口店，對於住新宿區來講好方便，因為這裡是晚上 11: 00 關門， 食完晚飯，可以在這裡消磨一段時間先返酒店，係一個好好的飯後甜品。 這家 BOOKOFF 位於這座大廈的 5至 7樓合共三層，雖然這家沒有二手錶和古著，但地方也算大，貨品也不少。 地址係 ： 東京都新宿区新宿3-18-1
二手店做到上市真係佩服到五體投地，BOOKOFF 由 Games，CD，DVD，Blu ray，漫畫，雜誌，寫真集，純文字書........一一都有，而且分店又多， 香港人來日本旅痕，無來過這裡尋寶，會失眠囉，咁多日版CD，有些更低至 105 日元 ( 以 8.2算約為 $8.5 港元 ) 你話喇~~ 日版CD $10 有找喎，邊度搵呀 ? 呢度咪有囉。
而且日本人一向自我保護意識強，他們自己知自己的產品係好野， 平日他們進行網上二手放售物品，多數唔會把物品賣出國外，他們只益自己友。 所以網上代 bid 咪可以應運而生囉，物主見個郵寄地址係日本地址就唔會理，放心去馬呢。 現在親身來到日本買二手現貨，唔上來尋寶，真係對唔住自己架，唔買都睇下。 你話比我一個唔覺意搵到日版王菲，或者日版 Beyond，再唔係掘到未開封的日版哥哥， 咁就光宗要耀喇喂~~未出發先興奮咪呢隻囉。
在日本呢段期間，我發現利安在 Facebook 貼出櫻花相，咁............豈不是他來了日本? 啊~~死喇， 如果比佢先來一步，咁D好野咪比佢掃晒? 希望佢唔好來呢間 BOOKOFF 啦。
果然，後來我見他在 Facebook 貼出呢張相，你唔好話我知你唔識呢D係什麼碟呀~~~
天呀~~~我都話架啦，每隻只售 1000 日元 ( 以 8.2算約為 $82 港元 ) 每隻 82元喎，去邊度搵呀~~~~~ 點解........點解............好似未開封架? 喂~~~我又要一套呀~~~唔該，唔該，好耐都唔該~~~~~
我唔同你講住喇~~去尋下寶先，點解呢個角落咁垃圾架 ? 亂得好緊要啊，唔知仲以為又 311添。 咪住先，左下角有盒..............
少女時代在日本推出首張專輯盒裝 DVD 只係賣 1950日元 ( 以 8.2算約為 $159 港元 ) 咁大盒，包裝又咁精美，平到嘔泡，日本人出名愛錫物品，你睇呢盒野新到呢~~~
係播，之前比唔知邊個一借無回頭的安良城紅日版 CD 碟，靈魂就在硬碟裡， 軀殼都唔知邊個衰人借走左又唔出聲，不如睇睇呢度有無二手先得。 在店裡找了一段時間，加上唔熟識這裡的分類，都唔知放了在那一個位置，點算好呢 ? 佢就係安良城紅 喇。
丫~~~~想到喇，有 Note 2在手，可以寫個名出來比店員睇， 咁咪可以節省時間，一步到位知道答案囉，我係咪好聰明呢 ^^ 就係咁，我就比了這個畫面店員睇喇，但...........店員的表情話我知佢唔識 安良城紅 係乜水。 我意圖用外國人都聽唔明的英語和她溝通，她當然係唔知我講乜吧。 於是我講多自然就錯多，同佢講係 Kawaii TV 的女主持，嘿~~~咁就奶野喇，佢話這裡係無出售 Kawaii TV 的電視節目。
我當場暈左啦~~~
心水清的你一定覺得我非常弱智，如果店員睇唔明 安良城紅 係乜水， 應該說出她的英文名 BENI ，而唔係講 Kawaii TV 囉。 唉算喇~~~我都係打消呢個念頭了，拿~~~世事就係咁，當我話放棄，去找安室時，正正就係比我見到呢四隻碟在貨架上。
我最愛的就係呢隻CD喇，可以搵得返，算好好彩囉。 拿，一借無回頭那位朋友，唔該你依家唔好還返隻碟比我喇， 更加唔好話比我知係你囉走，否則我會好好好好嬲你。
唔........收獲唔錯，再去 105日元區睇睇先~~~~嘩~~~$8港幣一隻日版CD，大家跟我讀一次丫
>>>>> 係日版。 平到咁，要用紅白藍先裝得晒心頭好。
一向少貨的中森明菜，這裡算係叫做多款了。 咁呢個範圍當然唔係105日元啦。
其他吸引人的還有..............
使人懷念的 ZARD ............
BOXSET 呀~~~
AKB 的華麗包裝 DVD都有售。
在升降電梯前有另一堆放到好似垃圾的雜物，嘩~~好多硬封面大大本的寫真集。 我見到有 含完幾香 寫真集都係賣 200日元，真係慘呀~~200日元一本，用來攝台腳都抵呀。 ( 以 8.2算約為 $16 港元 )
無陰功呀~~ 我最喜歡寫真集之一 廣末涼子 No Make 都係 $105日元，( 以 8.2算約為 $8.6 港元 ) ，貴過份報紙少少架~~~~ 唔知 廣末涼子 知道會點呢?
拿拿拿~~~大島優子就無可能105日元吧。
在三層BOOKOFF裡，好努力咁找 Hi-Vi 和 Stereo Sound ，最後係一本都見唔到的。 反而女生門喜歡的 ViVi 就輕易找到。
三層最最最最多人打書釘的位置就係漫畫區。
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。
|
