最愛的相機盒

發佈日期 : 2012年 5月16日    圖 / 文 : 巴斯

今日真係好開心~~~因為我行了好好好好耐都找唔到的一個，唔知是否存在的相機盒，這日終於出現在我眼前。

我要求好簡單，其實只係要一個夠貼身的箱，用來擺放NEX-7 相機加 18-200鏡頭，

目的係要與 (側咩袋 )內的雜物放在一起，唔會弄花機身就成。

但無奈一直都未能找到適合的，一係就好大個，一係就唔夠實淨。

圖中呢個就係我搵了好耐的相機盒了，樣子一點不好看，仲好老套添，

但唔緊要，因為佢永遠只會放在 (側咩袋 ) 內，永遠唔會拿出來示人。

側邊仲有一個細空間來擺放後備電和讀卡器，真係無敵。

你睇，個蓋仲要係非常方便的開蓋角度，連啪鏤都要係最方便的磁石。

這條側帶我係唔會用的。

　

內裡有最基本的保護，把整個相機盒放入 (側咩袋 )內，

內裏的雜物，就無法傷害到相機。

不過呢個相機盒只適合我個人口味使用，其他 NEX-7 加 18-200鏡頭用戶係用唔到的。

一般用家對這個剛剛好能放入NEX-7 加 18-200鏡頭的設計，一定好反感。

但對一向不喜歡用遮光罩的我來講就真係開心死。

你看，前後都無罩的情況下，是完美的貼身擺放，實在愛死她呢。

其他一向有用開前後罩的用家，一定講晒 18個字粗口鬧這個相機盒了吧。

所以我講只適合我個人口味就係咁解。

　

真係剛剛好貼晒，但又可以好容易咁出入，

絕對唔係鑑硬來，簡直係度身訂做，所以越用越喜歡。

只要用呢個角度，把相機的手柄向上擺放，咁我今後一伸隻手入 (側咩袋 )內，

就可以直插手柄，把相機抽出來用，真係方便到無朋友。

平日我只需 18-200鏡頭，就可以滿足到我 99% 的 Snap Shot 需求，所以呢個相機盒對我來講好重要。

　

就係因為方便，所以我用(側咩袋 ) 的時候，可以好方便咁在袋裡把 NEX-7抽出來用。

呢份方便對我來講真係好重要，只要取機麻煩，我就唔影架喇。

非常多謝上天給我找到一個我真係好有用的相機保護盒。

多謝~~多謝~~~再多謝。

　

　

200MM仲要乘 1.5 ，所以射程比較遠，呢點也是我點解唔喜歡 Full Frame 機的其中一個歪理。

最重要係，如果呢枝 18-200鏡頭唔係咁細，點可能帶出街四圍走呢? 

我只係無意之中經過路上，就伸隻手入側袋內，把相機抽出來影，就係因為方便了我，我會影到。

70 - 200mm f 2.8 ? 我有丫，不過放在屋企裡囉，醜唔醜呀，我好醜囉，原來鏡頭係買來放在屋企裡的。

Note + app

對我來講，係方便先決，雖然我擁有了上述一個咁方便的相機盒來放相機，

但都方便唔過我用手機，我用手機影的相，數量係多過 NEX-7 的。

由於市面上大量相機 app，呢類發夢Feel加濃味精效果相，對很多大師級攝影師來講，簡直係不知所謂。

但我就最喜歡喇，無需要做後製，篤下就有效果，對我呢D乜都唔識的人來講，成功感好大。

如果唔用呢類app，我影一世都唔會影到咁有Feel 的作品，可能你睇覺得離晒譜，

但最緊要，我無影響人又覺得開心咪得囉。

　

呢堆相，張張都係用 Note + app 的成品，無再經電腦後製（ 只係縮細原圖和簽名  )

就以同一個角度，與上面用 NEX-7 影的作比較，真係唔差好遠，

咁當然啦，你可以話我唔識用 NEX-7 ，所以影到手機都靚過佢。( 我唔反對架 ) ^_^

　

無野好得過自我陶醉吧，完全因為呢份成功感，所以我先會影得多。

對我來講，方便真係好緊要，幾優質的相機，只放在家中有鬼用咩，都不及放在褲袋的一部兼容相機功能的手機。

就算係放背囊都死，取機咁麻煩，我情願唔影了。

　

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。