復仇者聯盟 The Avengers

萬眾期待的復仇者聯盟 The Avengers 終於在香港上畫了，你睇爆到呢~~~~~

當然啦，如果近日連呢套戲都無睇的話，邊有話題同人講架? 何況長假期又來到，唔通留在家中發毛咩，到戲院睇戲係一個唔錯的娛樂嘛。

感激片商提供非虐待 2D版本，等我可以有機會入場，片長 142 分鐘，即係接近兩個半小時，如果要對雙眼硬食 3D的話，

無得欣賞畫質唔在講，仲要面對嘔吐不適的感覺，如果無 2D版本，我情願唔睇喇。

雖然逃過3D扼運，但原來也逃不過 4D 縮命，點解係 4D，因為夏天來了，

我唔好彩囉，有狐仙坐到正我前面，嗅到呢...........被臭氧層包住足足兩個半小時呀~~散場時幾驚自己因缺氣而死啊。

仲未算，居然有家長帶埋BB仔，我強調唔係小朋友，係BB仔來睇 The Avengers ，

嘩~~動作片喎，係咁炸架喎，如果那個BB唔嚇到喊，一係佢失聰，一係就套片齋講唔打悶死人。

之後就比人鬧爆，但父母居然仲駁咀，最終當然犯眾憎啦，佢離場時我差點企起身拍掌兼叫好啊。

講返套戲，好正，全片八成都是係咁打!!打!!打!!同埋打!!，而且尾段仲好似燒煙花咁爆到九彩，好爽呀~~~~

打得好睇時，又有笑料，係近年難得一套好的荷里活動作片，不過我睇應該洗了唔少錢，但我覺值得丫。

呢堆美國漫畫英雄片，之前獨立以個人方式上畫時，套套都對我來講好無癮，尤其係美國隊長，悶到我想死。

就算係 Iron Man 2 都係唔惦，不過今次呢套就正到無朋友，全片最搶鏡一定係 Iron Man ，

睇完呢套戲，使我更加愛上 Iron Man ，無論係 Robert Downey Jr. 定係 Iron Man 都係咁有型。正!!!!

次選係變身後的變形俠醫，雖然好後期先變身，但勝在打得精彩同埋搞笑囉。

片中叫做第一女主角的 Scarlett Johansson ，真係好唔惦，跌晒Watt ，我投入唔到佢叫靚囉，仲好肥添。

返而片中今次做 Samuel L. Jackson的女助手 Cobie Smulders 就好得囉，

她無論樣子，身形比例，身高，演技.......一一都好過 Scarlett Johansson ，好想 Scarlett Johansson和 Cobie Smulders 對調角色來做囉。　

你睇佢兩個樣，高下立見啦下話~~~眼有眼輸，鼻有鼻輸，咀都輸埋，入場睇埋演技，輸晒。

呢隻港版藍光碟我買硬架喇，唔該快D出，我想用家中器材睇多次，因為裡面都有幾段可以用來爆機用，

　丫........提提你，套戲做完的一刻，唔好第一時間離場，因為有一個片段在後面，留步睇埋片尾丫唔該。

在呢段等候期，畫面會播出各英雄人物身上的武器大特寫，拍得好靚架，係咁播住來等會出現的片尾，所以係唔會悶的，放心。

你睇佢之前導演過什麼片? 而且今次的故事佢都有份參與架。

無打算入場的朋友，睇完以下片段，看看會否改變你的主意呢?

女仕們夏天都穿得比較單薄，來到冷氣凍的電影院裡，尤其穿吊帶裙而且體重不夠100磅的女仕，脂肪含量小，

電影院有提供披肩免費借用，但需要按金，當散場時把披肩交回電影院，可取回全數按金。

ISQUARE IMAX 屬於UA 院線，和UA朗豪坊一樣，可在小食部和職員講，交$100按金後，職員就會交上披肩和借用證。

和圓方的披肩作比較的話，UA院線披肩質地比較厚，而圓方披肩比較薄，需要對摺來達到保暖，

而UA院線質料比較厚，無需對摺也可有保暖較果，而且那個厚厚質感，對女仕來講也有一點安全感。

但質料最好，而且獨立包裝，加上$40按金的海運( 嘉禾院線 )的披肩，是全線最好的披肩。

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

Scarlett Johansson	Cobie Smulders