PowerAMP

發佈日期 : 2011年 12月30日    圖 / 文 : 巴斯

倒米的播放器

原生在 Note身上的廢中廢播放器，使人誤會 Note 用耳機聽係非常衰聲，睇過不少用家報告都鬧到反轉，

其實係該個播放器衰聲，唔關 Note 事。

由 iOS 移民到 Android ，對我呢個新移民來講，需要有適應期，電腦內所有歌曲都是 AIFF 檔，

呢個廢中廢跟機播放器，根本就唔對應 AIFF 檔，千萬唔好叫我把整個音樂庫轉一次，我一定唔會咁做。

幸好有解決的 app推出，用戶只要安裝一個叫 PowerAMP 的 app，就可以好快樂咁欣賞到好正的聲效，

唔單只解決 Note用耳機聽歌衰聲問題，而且仲對應 AIFF 檔。

 呢個 app之所以有好的聲效，因為佢調聲工具了得，可因個人喜好而作出調校。

經過幼兒式的按鍵調校後，出到呢個聲我真係好滿意架喇，手機來架炸~~~我個人感到前所未有的滿意。

咁都唔夠靚聲? 明架喇~~~明架喇~~~高要求丫嘛，可多帶一個超靚聲的播放機，再加多一個耳擴，

再配上一個同自己個頭一樣大的耳機，咁就 Very Good 喇。

不過 Note 體內的喇叭又真係比較差， PowerAMP 都救唔到佢，不過平日真係好少用喇叭直出聲，用耳機多就真。

 Tone 

開啟 Tone 的情況下，只需利用圖中所示的三個鍵，就可以調出滿意的聲效，正到無朋友。

 EQ

如果用 Tone 調校完之後，還未達到滿意的話，還可加入 EQ作微調，

圖中所見的操作介面，就是這個 app的 EQ 功能。

可單獨用又得，混合埋 Tone一起用又得，得左。

封面消失

雖然手上的AIFF檔全都一早做好晒封面殖入體內，但好可惜，來到呢個 app上面，所有封面都無晒。

就以左圖所見，播放忘記他這首歌時，只見到 PowerAMP字樣，無封面，真係好唔開心呀。

在專輯圖示方式下，都係有大量封面係出唔到，

我.........真係好想喊出來.........

篤實就有封面

不過唔緊要，只要部Note當時係處於上網狀態，用手指篤實中間個 PowerAMP字樣，

等一陣....( 兩秒 ) 就會如右圖，透過互聯網，為用家找到近似的封套縮圖回來選用。

留意，只要對其中一首歌咁做，屬於呢隻碟其他歌，都自動一起擁有這個封面，

即係話呢隻碟有12首歌，並不需要做12次呢個動作，只需要做一次，就自動智能感染埋其他11首歌的封面，

真係開心到呢~~~~

圖像版權問題 ? 唔...........呢個...........

咁......可能需要開一個史廖林白蔡律師聯席會議先答到你，或者有答案先去用呢個功能會比較好。

如果唔想用網上找回來的版本，其實都可自己落手搞，搞完放返入手機內取用都可以，

不過我就無咁好心機喇，篤一篤就有，你叫我自己去做 ? 你玩得開心D啦。

選好封面之後，靚仔晒~~~

所以話，Hi-Fi唔只用來聽，仲要用來睇架~~~　

  Hi-Fi 用來睇。Hi-Fi 用來睇。 

前	後
前	後

亂碼問題

篤一篤，其實唔一定有封面架，除了網上不存在呢個封面外，亂碼都會使到找尋封面失敗。

在 iTunes上和 iPhone裡，日日都用得好地地的的歌名和歌手名，有某部份移民過來 Note 後，有機會亂碼。

呢D亂碼通常係成隻碟都一起亂，既然係亂碼，咁搵錯絕對係必然的事吧。

左圖可見，本來呢首歌的歌手名係叫趙學兒，變成亂碼，照篤.........咪找到呢堆封面囉，你話喇，點用!!!!!

如果有耐性和心機，咁改返正確名字的話先去篤........

咁就會找到近似的封面返來選用。

雖然係可以用人手修改返D名，但又歌名，又歌手名，同埋大碟名，首首歌係咁搞，

你搞埋我果份喇，我就無咁多時間一隻一隻字咁輸入返去。

解決方法

透過以下這6步，進入設定就可以解決有關亂碼問題。

More / settings /  aadvanced / Folders Library Scanner / Tag Encoding 

來到第 6步，只要把預設選取成 Chinese Traditional ( Big5) ，就可完成了。

Android Only

我意圖八掛一下 apple store 有無呢個 app，答案係無，究竟係暫時無，定以後都無，咁就唔知喇，

如果你係 Android 用家，可去 Market 下載呢個app來用，聽下係咪我講到咁好聲，

我自己都信唔過我自己，千其唔好信我講，自己去試一下，然後比個答案自己。

有試用版和收費版本  (港幣 $40.25 ) 選擇，試過好用的話，咪買來用囉，唔好比人話有錢買機，無錢買 app 嘛。

$40港幣可以改善部接近$6000的手機聽歌質素，你話比我知值唔值喇~~~。

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。