上海飛龍生煎

發佈日期 : 2011年 4月26日 

　上海著名景點南翔小籠飽，無可能唔識丫，但我去食過，唔係我幻想之中咁好味，

如改堂食仲衰，人多輪候加上服務不週，好似乞咁，扣晒分。

不過呢日好好彩，一行四人在虹口區四川北路其中一個商場，無意之中找到一間名叫飛龍生煎的地道食店，非常之得。

　圖中就係呢間店鋪大門口位置喇。

唔好似為係什麼五星級裝修，一睇就知係大眾化小店格局。

開放式廚房。

雖然地方唔係好華麗，但係勝在座位好寬闊，坐得好舒服。

每張桌面，都有食具提供。

由於怕水土不服，唔會向佢刨冰埋手。

臭豆腐

先來一個臭豆腐，$5 有4件，上海唔興點甜醬，咁我唯有淨食原味啦，

無香港的臭味咁濃，但都好食架。

咸肉菜飯

呢碗咸肉菜飯 $8 好正，

飯有黏性帶少少濕潤，連同菜和咸肉一起食好正，我保証冬天會食兩碗囉。

春卷

呢個春卷 $5 有4隻，我真係未食過春卷咬開後，會有汁，我強調係汁唔係水，唔係流出來果隻，而係濕潤。

你想像一下外面脆，裡面有濕潤湯汁的 ( 簡著 ) 係點丫拿。

湯飽

唔.........呢個就係我所講，好過景點區的小籠飽喇~~~~$6 有6粒，即係 $1粒，邊有平成咁架?

遊客區一定唔係呢個價啦~~~賣相都算 Ok，咁味道呢?

驚世大發現!!!!呢個小籠飽正到無朋友，我咁大個人未食過咁好味的小籠飽。

你睇D肉汁........首先咬開少少層薄皮，小心熱，等一等，然後啜佢D肉汁出來，唔好點任何調味料，再成粒肉連皮啪，

正到佢呢，唔好以為啜肉汁會感覺成口油，事實真係肉汁，完全唔覺油。

唔怪得上海人唔係叫佢做小籠飽，而係叫湯飽啦。

我在上海食過呢度的小籠飽，唔會再去遊客區架喇~~~

生煎飽

店鋪名叫飛龍生煎，咁生煎飽唔係招牌菜，咁係乜呢?  $5有 4件 ，一口氣要兩客，

所以圖中就來了一碟八個生煎飽，其實........邊個係面，邊個係底架?

埋口的一邊煎到金黃色，好似好得咁播。

我幾大都唔點調味架喇，等我撕開你層皮，睇下你乜野心腸先得。

嘩~~~~~又係有肉汁在裡面浸住D肉 ? 呢次我死喇，死硬喇~~~

等我食左粒肉先同你講呀下........

你睇個生煎飽裡面D肉汁，真係人都癲，你見到佢咁款，就算我話比你知唔好食，你都唔信啦。

飲勝佢!!!!!!!!!!!

啪完佢粒肉丸，飲完佢D肉汁，以為係食了佢最好部份，嘿!!!!!我真係估唔到佢金黃色的脆皮係咁鬆化，我強調係鬆化。

你見到個脆皮橫切面先講野啦~~~~

以上咁多野，都只係 $34人民幣，仲要四個人分，每人$9 有找，又小籠飽，生煎飽乜乜物物，都係講緊幾蚊，開心到呢~~~~

我唔係講笑，今後我再來上海，一定來呢度食咁地道的湯飽和生煎飽。

緊記唔好點調味，淨食原味。

呢間飛龍生煎係位於一個叫 東泰休閒廣場 地面商場餔位。

圖中這角度內的路牌左手邊，就是東泰休閒廣場。

向的士司機講，四川北路東泰休閒廣場就可以到達。

透過地圖也很容易找到。

東泰休閒廣場地址 :  上海市虹口區四川北路2002弄17號

地圖上也有顯示商場其中一家品牌店 (Semir )森馬百貨位置。

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。