iPad 2面世喇~~~

发布日期 : 2011年 3月3日            

万众期待的 iPad 2 终于和大家见面了。

唔好听我讲废话~~~~睇片先，好精彩!!!!

  VIDEO  

当我们昨晚还在熟睡中，apple教主在美国现身介绍 iPad 2 的出场，而 apple官方网页第一时间配合，贴出 iPad 2面世的详尽资料。

文字硬照还有短片，实在利害，好开心呀~~~

透过以上的硬照，你可见到是 3月11日( 星期五 )于美国正式发售。

第二批会在3月26日在欧洲和日本地区发售，香港未有声气，唉......无奈........

今次 iPad2 的售价由 $499美元起，即系我们的货币几钱 ? ............我唔知呀，唯有搵佢帮下手啦~~~

　 意倚~~~曾俊华比我果$6000 咪够买啰 ，找返钱仲够食粟米班腩饭，多谢晒呀!!!!!! 

不过话时话，我食虚心乐园餐比较多，我真系唔知粟米班腩饭几钱呀。^_^

黑白两色选择

今次推出黑白两色选择...........啊~~有白色?

咁即系解决了早前白色 iPhone 4难产的透色问题了!!!!!!咁是否容后推出白色版本的 iPhone 4呢?

直到刚刚我起床，美国 apple 官网都无提到有白色 iPhone 4的出现。

讲返 iPad2，屏幕依然是 9.7 " ，之前传闻又话大又话细，又话解像度会好高，仲话用和 iPhone 4一样的 Retina ( 视网膜 )显示屏。

且~~~~根本就唔系用 Retina ( 视网膜 )显示屏，解像度依然是1024X768不变，D人乱咁车～～～～

早前传说话会有USB接口，结果现在证实系流料~~~~激死人 。

而侧身的声音键，加了独立的静音键，太好了!!!!

前后置镜头

二代拥有前后置镜头，可以影相拍短片就唔在讲啦，仲可以用来玩 FaceTime ，系父母和小朋友的最佳通讯器材。

下图为iPad2前后镜头不同之处 ( 与 Touch 格式差不多 )

双核心A5处理器

图中可见，双核心A5处理器的出现，A4处理器立即Out左了!!!!!!

比起旧款提升 9倍效能，虽然处理运算效率高了，但电池用量依然可用 10个小时~~~~

二代比一代轻，而且更纤薄。

厚度由原本的13.4mm减少到 8.8mm ，比 iPhone 4更薄，而重量方面，由1.5磅减少到1.3磅。

啰命保护套

首先睇左呢段片了解保护套有几啰命~~~

  VIDEO  

apple主打呢一款名为 Smart Cover的保护套

留意呢一款保护套和 ipad 2机身连接处，是用磁力方式来固定，我当然无见过实物，

不过大家一定会担心不小心出脱落而遗失的问题，不过我相信无我想像中咁化学挂，

因为咁大间公司，一定有好多专业入仕测试过先推出，到时见到实物再评论都唔迟。

留意呢款保护套，唔系单单用来保护个屏幕咁简单，

用家掀开保护盖时，荧幕会自行开启，如果盖着屏幕的话，荧幕会自动进入休眠状态，

啊~~~~以后开机唔需再拖那条Bar或者开机键，太腐败了吧~~~

我就是死在这个保护套手里喇~~

呢款机套一共有10个不同颜色选择。

无见过实物，一时之间都唔知道边个好睇，A~~你呢，你选边一个色呀~~~我初步对浅绿色有兴趣。

跟机送? 

请勿性幻想，要钱买的，无可能送啦，有两个价钱架播，因为有唔同物料选择，

聚酯物料为 $39 美元 ( 即约港币 $304 )和皮革物料为 $69 美元 ( 即约港币 $537 )，好好好好好名贵啊~~~~~

咁摺起又真系几型仔，呢个保护套和我一直用开的原厂套有好大分别，

因为旧款套是把整部机包着，她原色系睇唔到，所以机身是什么颜色，无所谓。

但呢款新套就唔系咁讲喇，因为佢最主要系保护个屏幕，

机身系不在保护范围，所以部机系乜色就会见得清清楚楚，而且旧机套唔可以好似新套咁轻松直立部 iPad。

用了咁耐黑色机身 ( 虽然长期被机套包着 )，系时候转白色玩下喇~~~~

你呢?你打算买什么颜色呢?

 Face Time

你睇下，用咁大个显示器来玩 Face Time几开心!!!!

正如介绍所讲，老人家和小朋友，一定好喜欢这个功能。

跟机搞鬼 Photo Booth 

今次跟机内置有多呢一个名为 Photo Booth 的搞鬼apps，系把镜头拍出来的影像同步分成九格，

而且仲会把人样，以哈哈镜方式恶搞，比小朋友玩，一定笑到流口水呀。

免费的跟机 apps 还有以下这一堆，想得到更多免费 apps，当然就系自己搞啦~~~

 iMovie for iPad 

由于 iPad 2有镜头关系，拍完片唔需要倒落电脑，唔好再倒来倒去喇。

Apple会为 iPad2推出 iMovie for iPad 呢个收费 apps，

用佢来把拍好短片在这个 9.7"显示屏上拖拉剪辑会好开心啰。

哗~~~~你睇你睇~~~~拍完D片，就地正法，Upload完上Facebook或Youtube，未返到屋企，就接受万人赞好喇~~~

Camera Connection Kit 

早前有个傻仔，听传说第二代 iPad 会有USB接口，佢居然第一时间把套 Camera Connection Kit 二手贱卖，

哈~~~~依家见到第二代依然系用个 30 Pin来接 Camera Connection Kit ，真系喊到收唔到声，

个傻仔系边个? 咪就系写呢篇文章个条傻仔啰~~~~

AV Adapter

强项仲有呢D功能架播~~~不过对我个人来讲，

唔系咁用得上，不过到时推出再算啦！话晒都系HDMI输出嘛~~~

美国售价

iPad 2 有三个容量给用家选择购买，分别是下图表所见。

仲有埋美国本土的3G上台价目表添~~~似乎在美国本土，3G+Wi-Fi版是要被捆缚呢~~~

　IOS 4.3不日推出

大家还记得早前推出的 IOS 4.3 Beta 版吗? 内里提供了一项超好用的 Wi-Fi 热点功能，

就是容许 iPhone内的 3G上网功能，分享给 iPad 共享，而 iPad 又可以对应到利用作为上网之用。

对于同时拥有 iPhone和 iPad 的用家来讲，方便得来又节省金钱。

在 apple官方网页这日都显示，提醒大家 IOS 4.3不日推出的消息。

既言iPad可以借用 iPhone所分享出来的网络，咁即系 iPad可以周街上到网，因此，3G版的 iPad对我来讲，是不必要的。

所以我打算向净 Wi-Fi版埋手。

美国购入

如果打算找美国亲友帮你买的话，千万不要以为用上述官方所提供的银码就可以买到，

美国是有消费税的，每区税率不同，以L.A.为例，税率 10% ， 

假设打算购入价值 $4668的32GB Wi-Fi版本，就要附出约港币 $467 税款。

而且iPad呢类电子产品，是要额外再收取约港币$90的环保费，

之后就系运费，无理由座船来香港挂，以 fedex为例，iPad重约 1.3磅，

加埋个盒，附件呀咁，计佢大约 2磅，4 日时间速递费大约  ( 港币 $700 )，加加埋都系一条数来架。

个人幻想

旧机只有 256MB Ram，利用 Camera Connection Kit来Load大量相片，

又或者去一些图像较多的网站时，都会因为不够Ram而跳走。

由于第二代新机可以容许用来剪 720高清片，加上要运算其他高流量 apps，

所以第二代内置512MB RAM ，足足多旧机一倍。

另外，由于现时所用的 IOS 4.2.1是提供繁体而且有繁体输入法在内，

所以我不担心购入美国头一批货IOS 4.3会不对应繁体和手写输入繁体。

反而我担心自己无乜可能会买到第一批货就真呢~~~唯有发梦啦~~~

放血价

虽然我系发梦，但香港 apple官方网页暂时无得卖 iPad 2，系铁一般的事实，咁佢又唔会乜都唔做播，

即时放血大行动，把 iPad一代售价调低，入场费由 $2988起 ( 原价 $3888起 )，

呢个动作，第一代 iPad二手价，即时又有新的指标了。

如果昨天买了 iPad的朋友..................噢 Sorry 早买早享受，迟买平几旧 呢句安尉说话都帮唔到你喇~~~

各师兄与朋友，这篇文章，如非商业用途，欢迎转贴再转贴，如需借图片使用，

请自便，但敬请不要抹去图中的 avbuzz.com签名字样，感激感激再感激。

◆   avbuzz.com精神，人人毒我，我毒人人 ◆

　谢谢收看这篇文章，你是第 个收看这篇文章的读者。