DC 美食

發佈日期 : 2009年 5月25日     圖 / 文 : 巴斯

剛剛過去的星期日，一大班朋友十多人，去了一家很出名的食店晚飯，無論食品味道，或是現場氣氛，都十分吸引。

這家店對我來講，除了食物味道好之外，最得意是他們的大字報，他們的用詞好了得，單是見到標語都會吞口水，

加上我又再一次可以利用DC相機仔影相，所以好想和大家分享下。

今次和大家分享的食店就是以小菜出名的張仔美食館。

好啦，點菜開始~~~~

老闆，先來一個 豉汁炒蟶子 丫唔該。

我強調，個汁好好好好好好好味，真係想打包個汁返屋企啊。

蟶子當然都因為個豉汁而更加好味喇。

跟著就來一個 辣酒煮花螺，由於我唔食得辣，

食左小小粉絲，只可以勉強接受到一小口，邊夠膽大力啜個螺肉啊，咳死我都似，所以點到即止算了。

當見到牆上貼出張咁樣的大字報!!!!

點可能唔叫返隻招牌菜 蒜香雞 呢? 老闆唔該~~~~

炸過的蒜，佈滿隻雞上面，好香呀~~~

最好味當然係右圖呢一個位啦，什麼位?

雞髀囉~~~~我唔客氣喇~~~~ 一咬落去，我仲邊可能同你講到野 Jack?

白飯魚都可以併出咁多款，實在開心死，老闆直頭驚大家唔死咁，

再要在前面加上 金莎椒鹽 呢D字眼上去。

組合決定好喇~~~~~~就係白飯魚雞軟骨，

老闆所指的 金莎，就係指炸了的  蒜。

來多一客 蒜脆西蘭花炒牛筋肉

雖然個名好吸引，但只係算一般味道。

避風塘炒蟹

呢款係全晚最後先能勉強食完的食物，但也是全晚最名貴的一款菜，

因為大家都唔想食得麻煩，只選其他一啖一口的食物，當大家都肚滿腸肥之後，先會打這一款的主意，

所以如果你下一次有機會點菜的話，除非大家都好想食蟹，否則最好不選這一款呢。

由於我自己一向都不喜歡食蟹關係，所以我一口都無食過，是否好食都唔知啊~~~~

上面都叫好多肉類了，不如叫一些蔬菜丫~~~~但叫個什麼菜好呢? 

啊~~~~~~通菜有咁多個不同組合，好似好吸引呀。

  組合到喇~~~

來一個 廖孖記腐乳通菜鮮尤皇 啦~~~~，另外一提，呢間店鋪好醒，居然有 廖孖記腐乳 發售給客人的，

喜歡的話可以買埋返屋企自己煮呢。

個名好地地叫 翠肉瓜爆帶子咪好囉，無啦啦加個咸蛋黃響前面，真係流晒口水，唔該快上丫。

香橙牛仔骨呢個名都好吸引啦，你做乜仲要加 蜜餞 兩個字響前面，

淨係個名都殺晒啦~~~搞到人地吞晒口水咁，做乜 Jack ?

你睇佢個樣~~~~請留意個汁，我依家話比你知唔好食，你會信嗎?

呢個好正呀，我食得一件就比班蝗蟲掃清光，他們沒人性的，欺負我要影相，起步慢。

剛剛有一個 豉汁炒蟶子，味道比較濃烈，為了想食鮮一點，

所以再來多一個 蒜茸粉絲蒸蟶子。

兩者比較，我還是喜歡  豉汁炒蟶子

唔~~~~都差唔多喇~~~叫多兩款飯丫。

左圖的炒飯，在店鋪的名稱叫做 大肚婆炒飯，朋友告訴我，大肚婆生完BB之後，個肚會有風喎，多食薑的話，有驅風作用，

朋友索性叫她做 薑炒飯，上菜的時候，成碟飯出晒煙，撲鼻而來的薑味，真係香到無朋友~~~

而右圖係 生炒臘味糯米飯，廚師炒得唔乾身，唔會硬到食完胃痛，但軟身得來不會好似水浸咁款，

留意兩款炒飯，都係炒到一粒粒飯，無得頂~~~真係好好味。

兩款炒飯都係第一批被掃清光的食物啊~~~

留意圖中大字報上所寫的價錢，千萬不要誤會是正價，$28是宵夜價錢，正價絕不可能是$28呢。

飲杯野先~~~唔好又係飲汽水咁悶啦~~

呢個好好飲呀~~~入口時，好有清新的龍眼味，甜甜地，好正~~~保証好飲過汽水。

標題所寫的  超平 字眼，實收係 $28 ，叫兩杯........ $56，你覺得是否真的超平呢? 

老闆送的老火湯，個名好鬼長，叫做 冬瓜淡菜仔去濕湯，味道一樣咁正~~~由於我們人多，所以送了兩大窩。

多謝老闆。

總結

這晚埋單 一千七百幾，就以上述所提到的 蒜脆西蘭花炒牛筋肉 為例，每碟 $78，

兩款蟶子不同做法，但係同樣收每碟 $138 ，隻雞 $198，在我個人心目中，不可能叫經濟小菜，在我心目中是中上價了。

但煮出來的味道，確實是非常好味，如果下一次再有一大班朋友的話，我都會選擇來這一間食店，

一來我不喜歡傳統酒樓的氣氛，二來傳統酒樓沒有做得比這家食店好。

全晚最最最最最回味，雙冠軍的是兩款飯，第二位是蒜香雞，第三位是龍眼蜜，

第四位是香橙牛仔骨............噢!!!我漏了蜜餞 兩個字，真囉命~~~

第五位是 豉汁炒蟶子，我話你知，淨係呢個豉汁都可以撈兩大碗白飯。

上述係最好味又值得推介的菜式，而以下兩款就不建議我的朋友叫了。

第一個就是上述我提過大家不太喜愛的 避風塘炒蟹，不要少看這碟菜，

收費是 $ 498，只差 $2 就 $500，最不值得就是這一款菜。

另一款就是做得不太好的  翠肉瓜爆帶子 。

雖然這家食店收費對我來講是中上價，但並不代表他的裝修會好吸引，

他們的門面只是平日街坊小菜的食店無分別，一點都不起眼，食的只是味道吧！

如果你覺得這裡的價錢比較貴的話，下圖有兩個方法，可以平一點找數的。

這晚又有得影相，又有得食，生理和心理同時得到滿足，而且可以一班人食多好多不同的菜式，實在太幸福喇~~~

同場有銀手的  LEICA LUX - 4 和 紅色小人 /  dc925 的  Panasonic LX-3 一起影。

而我.............當然係用我最愛的 Canon 870IS  DC仔影啦。

如果你都有興趣去呢間食店試下的話，一定一定一定一定要訂位，

平日都好多明星和他們的朋友來食，加上這家食店好多人都識得來，所以每晚都好多人架。

越係人數多，越係更加要訂位。

訂座電話 : 2817 1671

地址 : 西環厚和街16-18號地下  張仔美食館

如果你唔識去的話，可透過以下這個 拖拉地圖，使你大約猜想到是目的地位置。

在較大的地圖上查看張仔美食館

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。