圖 / 文 : 巴斯
一向係黑仔的我，早兩日NAS 內的4隻 WD Red 硬碟，其中一隻突然死亡，NAS 立即響機，正所謂養兵千日用在一朝，NAS 這一刻就是發揮她最大用處之時。由於早設定以 RAID 5 運行，資料當然唔會因為死了其中一隻硬碟而有所損失，只不過NAS自動進入降級模式，由其他三隻硬碟保持正常運作，依然可如常存或取資料，接近零打擾，直到換上健康的硬碟替換。我黑仔王外號唔係浪得虛名，呢4隻 WD Red 硬碟，當日買回來 8個月後的某日就死了一隻，當時還在保養期範圍，官方也換過一隻全新給我( 按我得到重溫 ) 。
經了解後，立即飛撲去官網輸入序號查驗，真係一額汗，原來下月就係三年保養期屆滿。下圖是官網即時顯示我所輸入序號的保修日期。
當然立即照官網所定程序去做，兩個工作天後，帶埋條屍去九龍灣對換。唔想親身去，自費 $50 運費都可以。
親身去的話，方便到離晒譜 ( 對德福花園街坊來講 ) ，穿過德福廣場第二期就見到，圖中正前方黃色大廈就係目的地。但我唔係呢度街坊，當然覺得不方便，長途車後還要步行一段路。咁唔滿意，咪換囉，去黃金一手交錢一手交貨就走得，豪比佢~~~~。豪唔起? 咪跪囉。
所謂三年保養
交收期間我先知道所謂三年保養，意思係頭兩年全新貨換壞貨，由第三年開始，只能以翻修貨對換壞貨。如圖所見，官方翻修貨是同一規格，雖然有齊內和外盒，但身上貼紙，沒有RED LABLE 。
個袋都係密封，要開封先能取出使用。工作人員清楚交代為何以翻修貨對換的理由，並解釋規格相同，只是沒有換上相同紅邊貼紙的淨身版。
一向黑仔的我連專門針對 NAS 長期運作而推出的 WD Red ，都有能本事三年死兩隻，其實臨保養期屆滿前壞死，阿Q點來講，好彩了。正所謂死得好不如死得早，如果去年死更好 ^^。 平日NAS主要用得最多也只不過是讀取音樂庫，其他都只是一般資料提存，我唔覺得係負荷，咁小工作量都三年死兩隻，我咁樣都唔係黑仔，仲會係乜?或者我八字不適合這個品牌，所以我決定改用 TOSHIBA ，經過 正都 見4TB 企業版都係賣 $850 港元，而且有 5年保養，唔該一隻…….走膠袋丫 ^^
