|
ORICO 硬盤保護盒 發佈日期 : 2015年9月19日 圖 / 文 : 巴斯
右手邊的 ORICO 3.5寸硬碟保護盒好像很適合我用，家中有不少備份硬碟，都係在無任何保護下存放在櫃內，如果有個保護盒會好一點。 另一方面，有些硬碟是要經常放近雙盤位硬盤座 ( 座廁 ) 備用，唔想硬碟封塵，有佢保護會安心一點。
有5個顏色選擇，咁我咪可以用唔同顏色，代表不同種類囉，太好了。
等我計計要幾多個先夠用.......一五一十，十五二十，啊.......算算原來都要20個先夠用。掘指一算，20 個即係要 $500 ，老闆唔該比 20 個我丫。
出手前可唔可以先問下Skynet 呢?
等我用 硬盤保護盒 這個名詞找找先，嘩~好平，但好重日本成 Feel 囉，唔係有錢買硬碟，無錢買膠盒下化? 佢地個樣咁狗肉，我直頭唔想正視佢，送比我都唔要，仲講要錢?
$12 人民幣 太好了~~~終於比我找到，呢度賣$12人民幣，相等於 $15 港幣，足足平左$10 港元，買20個豈不是節省了$200 港元? 扣埋運費都開心死。就訂 20個。
懶到你咁的人，都係第一次見。
$9 人民幣 啊~~~原來$12 買貴了~~~~呢度只售 $9人民幣，相等於 $11 港幣，$25-$11 ，每一個足足平左 $14 港元。
$8 人民幣 原來$9 都係買貴了~~~~呢度只售 $8人民幣，相等於 $9.7港幣，10元有找? 天啊~~~ $9.7 X 20個 ，二九一十八，七二一十四，三下五落二，馬八進九，出前一丁，計到了。 20個即係$194港元，本來 $500 先有交易，現在埋單唔需 $200，平咁多，豪比你，要21個。
由於顏色方面無需綑綁雜色，可獨立自選購買單一顏色也可，於是一口氣訂了 21個回來，以兩個顏色分類，實物到手用過後，覺得非常好用， 正打算訂埋紫色，用來存放 Magic TV 雞頂盒所錄硬碟，今後以三個顏色分類，一目了然，開心好多。 黃色與藍色代表什麼? 哈~~~咪就係........車~~我點解要講你知呀 ^^
凹凸疊放槽 我最最最最喜歡佢每一個底部和表面都有凹凸疊放槽，一個凹一個凸，疊起存放時起了齊整作用。
唔需對位，一放上就把她們對齊，方便到不得了。
透過以下動畫可見有多神妙。
放得咁齊整，完全都係靠這個凹凸疊放槽，一放正就係咁齊整。
雙扣設計 開口位是雙扣設計，關上後，唔會自動彈開，實在愛死這設計。
軟顫 盒內還付有圖中所見八粒軟顫保護，萬一有輕微碰撞，例如撞到人地個胸，化震效果還是可頂得到，起碼唔會硬食，風火輪式跌落樓梯就當然唔得啦。 註 : 胸 在2015年被視為攻擊性武器，所以呢個盒萬一撞到胸部，是不能小看，我剛試過，相信我，這膠盒，絕對可通過胸部直接撞擊測試。^^
放上硬碟後，虛位唔多。
太好的產品，一於多購幾個紫色比雞頂盒硬碟用。
香港行貨 講左咁耐，其實我都唔知手上購入係咪被騙的假貨，更唔知其物料是否帶有放射性致癌物質，為保障自己，購買香港行貨會有信心保証。 基本上腦場不難找到香港行貨發售，但如果連搵都廢事，又唔格價，咁可以一步到位去深水埗黃金商場地庫 匯訊 的收銀處桌面找到。 售價 $25 我當然無格過格，所以不知道是全港最平，還是最貴，敬請見諒。
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。 |
