換腦

2015年 5 月15日    圖 / 文 : 巴斯

距離上次換電腦的歷史有一段長時間了，近日打算把柴油式電腦更換，正想找人取經之時，

發覺原來這世界迫人家聽手機錄音是浪費別人時間。

生活方式被填得滿滿的 2015年，只是聽錄音都阻到人，要對方花時間心機推介電腦，相對顯得非常奢侈。

我又豈敢為了自己買部電腦而去打擾人呢? 

自己買電腦關人蛋治咩，如果要買樓，豈不是由小學同學開始問到街市豬肉佬?

一想到呢點，正所謂求人不如求己，直接向黃金商場地庫出發。

平日買電腦產品，唔想煩算到盡格價，

都是直接去 Centralfield、正都或者匯訊，視乎邊個門口入就腳就幫邊家買，

未必是最平，但最貴一定唔係她們。

今次砌機找了 Centralfield ，點解係佢 ? 無特別理由架~~~只係那位店員態度好架炸。

之前問過一間，店員語氣不可一世，問一句答一句，而且滿不耐煩，慘過求佢，

免喇，我唔係來乞，更唔係來搞事，只係多問幾句吧，打擾你不好意思。

指定要求

這位 Centralfield 店員就好得多，起碼唔會趕客，所以選擇這家，就係咁簡單。

向他表明來意後，說出我自己在其他地方買了 ASUS GTX970-DCMOC- 4GD5 顯示卡，

另外兩個有 Data 硬碟都希望順手殖入新機體內。

向他講出我對硬件有什麼指定要求，想他幫我執一劑，咳咳，意思係想他幫我執劑藥 。

你識我咁耐都知我一向表達能力低，我向他指手劃腳，又拱橋，又倒立，

連一字馬都做埋，店員都很有耐性聽我吠。

非常滿意

滿意的唔只他為我度出呢條藥方，還有店員態度，其中一件白痴事係店員問我要 SDD 還是 HDD ，

我居然問兩者有什麼分別，你話係咪神經病? 比著其他店員真係一個側踢我穿玻璃出啦，

但呢位店員佢真係好認真咁解釋我知兩者分別。

其實我個腦係想問佢兩者價錢有多大差別，但口快快講錯，

點知佢好有禮貌咁回答我，講了幾句我先發覺唔對路，立即再問過，

不過其實想清楚，問兩者價錢差別都係有問題的。

另外在底板上的選擇，因為我的個人要求，花了他好一點時間，他也認真地和我討論，

再反問我幾個問題後，張單就出來了，最終能幫我達標。

這就是他聽取我個人要求後，為我度出呢條藥方。

在這裡多謝該位店員，服務真係好好，我就係需要他的專業智識吧。

取機

藥方完成，取藥是去另一座大廈，由於只是付近，加上二樓，一點都不覺得不方便，食個下午茶回來便有取。

帶來的兩個有Data硬碟和顯示卡，都被工作人員安裝在機內，工作人員還開機給我驗收。

想不到取機的工作人員都一樣好態度。

由於要 Keep 盒一星期，我無自備購物袋，他語氣帶點不好意思的向我收取額外 $1 膠袋費，

想必近日一定是很多客人一哭二鬧三上吊，使他很難做吧，用者自付嘛，明白的。

另外驗收時我所提出的白痴問題，他都詳盡解釋給我知，尤其我只係八掛想知另一位客人所用機箱幾錢，

他也努力地去為我查，感激~~感激，再感激。

感覺良好

新電腦，一來新鮮感，二來上一部柴油式，換成現在又快又靜，點會不滿呢?

何況我要求不高的情況下，當然感覺良好吧。

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。