|
10位 USB 充電座 發佈日期 : 2014年 8 月29日 圖 / 文 : 巴斯
網上流傳這張圖，相信大家都見過，完全表達到每位朋友手上流動裝置電能對心情影響， 巴斯都唔例外， 基本上係 100%全中，尤其尾三的表情，真係好恐怖的 ^^
接近 1萬 mAh 尿袋，數碼相機，智能手機，平板電腦，流動音樂播放器............一屋都係要用USB來充電的器材， 圖中所見，單單只係四個 USB 火牛，所佔用拖板就頭痛，再接多幾個就更討厭。 市面上所謂 USB排插，都係得個多字，大部份只能同時提供 1A輸出，大食一點的器材都應付唔到，得物無所用。
1個打10個 8月初 Magic Pro Pro Mini 推出呢款同時提供 10個 USB 位的 Powerstation 10 充電座， 今後可以一腳踢走晒阻手阻腳的火牛，有無留意仲有隻兩腳火牛學人玩另類，問你死未 ? Powerstation 10 充電座，本身就係一隻牛，唔存在呢個問題，比條電線佢得架喇。
呢款 Powerstation 10，今年電腦節可以講搶盡風頭。 淨係做電腦節左鄰右里的街坊生意都夠皮，你話我知，有邊個攤位唔需要插 USB的呢? 呢個充電座一口氣提供 10個位， 而且 最最最最 重要係佢可以同一時間提供到 5個獨立 5V / 2.4A輸出。 跟我讀一次 : 同一時間 5個 5V/ 2.4A 輸出 如果只係得 1A輸出，同時比10個你都無用啦，依家D裝置，無論手機定平版，部部拿埋都 3千幾 mAh，1A 充到幾時呀? 所以呢部野在電腦節爆紅賣清光係必然，有黑色和白色選擇， 你知我一向有選擇障礙，好彩無紅色，否則入青山，我想了很耐，經過一輪人生交差點之後，終於........
透過其他雜物一起，可猜想到 Powerstation 10 實物大小， 留意呢個比例只係包裝比例， 應留意機身充電座體積。
透過包裝背面，可見這產品簡介。
2.4A X 5 或 1A X 10 這機提供 10個位 ，兩個充電狀態組合選擇，分別是 2.4A X 5 或 1A X 10 ，送 80cm 純銅充電線..... 這些資料都可在包裝上見到。
把包裝拆開之後可見到分成兩個部份。
最重要當然係這位主角吧，透過手的比例可猜想到實物大小。
面板上除有10個位USB插口外，還有指示燈。
燈位清楚指示 1A 或 2.4A 運作狀況。
機身背面也可見有關這產品基本規格， 當中包括提到屬於世界電壓，基本上見插頭就可插上，帶去旅痕也無問題呢。
機身側面只有這兩個位置有功能。
第一個就是這個 8字電源插頭，電力來源就是靠這個位置得到。
第二個就是 1A 或 2.4A 輸出選擇鍵，意思是 : 選擇 1A的話，10個位的每一個 USB插口輸出為 1A輸出。 選擇 2.4A的話，10個位的USB插口，上排的五個就暫停運作，只餘下排 5個USB插口，以同時每一個獨立以 2.4A 輸出。 即係話 同時可為五部大食機，每位提供 2.4A輸出作充電。
當用家切換成 2.4A 狀態， 也代表著這機只有下面 5個USB位可充電，上面 5個 USB位是暫停運作。 10個位同時運作，就只有在 1A 狀態下適用，所以非常時期用非常方法，睇你自己點運用。
主機介紹完，接下來找找其他位置是否有付件跟來， 這個位置好像有什麼在裡面.........
啊~~~~~裡面原來有說明書，電源線和充電線各一。 電源線是香港合規格的三腳電源線，如果打算帶去日本，台灣，美國........你懂配的吧。
純銅充電線 付件當中還有圖中所見長度為 80cm 純銅充電線，嘩~~~~~鍍埋金咁開心， 純充電，不過Data的純銅充電線，惦喇，如果送 10條就更正啦 ^^
你睇官網提供的圖片幾開心~~~~~~~~~~~~ 生產商話，其產品通過多項國際認證， 包括 CE 、 SAA 、 KCC 、 ETL 及 PSE 等認證，提供智能防過流、防超載、防短路及防過溫保護，確保産品安全穩定。
每部港幣 $399 呢四個火牛幾阻地方，有了 Powerstation 10，節省返唔小地方之餘，仲可以同一時間最多充 10 件器材，你話開心唔開心先。 講咁耐都唔記得講價位添，每部港幣 $399，除開10個位，圍起每個 $ 39.9 。
如果用家打算長期只用 2.4A的話，即只長期使用 5個位，而並非10個位， 那每部以港幣 $399計算，除開 5個位，圍起每個 $ 79.8 。
旅痕良伴 她們通通都接近零能源，需要盡快充電，數碼相機為例，專用充電器幫我搞惦一粒，但係另一粒就要靠 USB 充.......... 同一時間能為五部大食機，每位提供 2.4A輸出作充電，對我來講好重要，第二天一早又出發喇，何況我唔想帶咁多火牛同行。
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。 |
