|
國磚 乾龍盛 發佈日期 : 2014年 7 月8日 圖 / 文 : 巴斯
銀河系最強兩部能硬解DSD流動播放機之一，更超越 AK240，能直接播放 SACD ISO ， 他的名字叫， 乾~~龍~~盛~~ QA360正是這機型號，以國產磚頭機來講，真係好靚聲，所以她是近日最強國磚。
Yesun 早是乾龍盛上一個型號 QA350用家，一直用開都非常滿意她的聲音， 當廠方宣佈新型號 QA360 規格，並接受網上訂購時， Yesun第一時間撲入，成為第一批擁有這機用家，可想而知，Yesun對這機有多大信心。 下圖所見就是新舊兩款型號一起合照， QA360備有黑色和銀色選擇，好明顯Yesun喜歡銀色。
舊型號雖然有顯示屏，但中文歌名會變成右圖所見的亂碼。 另外就算係英文歌，也會因為長名字，無法見到所有字句，呢個顯示屏可以講屬於明存實亡。 由於她輸出比較大，Yesun平日多是用她來煲耳機或煲線之用。
圖中所見機背是Yesun 自行貼上的防滑貼，不屬於乾龍盛本身的物品。 這是工業用的物料，最多人用在樓梯作為防滑工程之用，Yesun之所以用上這物料， 喜歡其貼力超強，基本上貼在機身都唔會脫出，加上有紋，防滑效能比一般平面設計的防滑貼更高。
暫時整個銀河系，只有AK240 與 QA360這兩部機是屬於硬解DSD流動播放機， Yesun 這日帶來這部國磗給我見識下。 由於我是 AK240用家，我做唔到中立態度去看這部 QA360，請見諒。
圖中所見，除了 AK240 不屬於 Yesun 外，其他都是 Yesun 的玩具。
識我的人都知，Hi-Fi 唔只用來聽，還要用來睇，第一眼見到乾龍盛 QA360，真係被她外觀嚇親， 沒有想像過會咁大部，是我所見這年代的國磚體積之冠，Yesun真的會帶她出街嗎?
透過手的比例，可大約猜想到實物大小，看到右圖的厚度嗎? 就是這個角度，使我想起一位舊朋友...........
就係佢喇~~~~，部機厚成咁，時光倒流咩，今日係 2014年啊~~~
支援 128GB 上世紀的第一代流動播放器訊源係卡式帶，現在是記憶體，體積小容量大，這就是科技的進步。 但機身體積還停留在上世紀厚度呢。
人生第一張 Yesun 是攝影高手，無論是技術討論或是實戰成像，都是一等一高手， 一位攝影高手，他人生第一張 128GB記憶卡，居然係為播音樂而買，而並非為攝影。 細心想一想，邊有咁笨，把所有相片影在同一張大容量卡上，我去旅痕一定分散幾張卡影，仲要做多次備份添啦。
能夠把記者招待會惡劣環境現場，影到好似 Studio 一樣高密度光質感，膚色白裡透紅的攝影高手， 他人生第一張 128GB記憶卡，居然係為播音樂而買，而並非攝影。
這些記憶卡，內裡都是存放不同曲目和格式的高清音樂檔， 為的是方便在新機發佈會插上新機使用，能聽自己熟識的音樂，先可為新機作出初步評估。 留意左上角，連 Mirco SD Card都擁有。 另外左下角的16GB SanDisk ，正是QA360跟機送的記憶卡，送有牌子卡真係重手，但16GB容量，對Yesun來講只能做後備卡吧。
Low Level Format QA360體內當然有記憶體，基本上用來裝佢自己的 OS 吧，存放歌曲就只能單靠 SD 記憶卡了。 在QA360身上，首次必需要以 Low Level Format 為記憶卡格式化， 咁先可以發揮到張卡的極速與隱定性，絕不能偷懶，格式化之後先把所有歌曲傾到下去。 這張128GB卡屬於 90讀 60寫 高速卡，也要 40分鐘方能完成 Low Level Format 。 提提你，用了40分鐘只係 Format 所花的時間，仲未有得聽住，你答我打爆一張128GB卡要幾耐丫拿，不過都係首次所要花的時間吧。
欲練神功 必先自宮 QA360操作非常暢快，之所以咁快，全因為他無任何縮圖，所有花巧功能通通都無， 使我想起葵花寶典，欲練神功，必先自宮。
由最外層直到目的地該首歌，都係無封面，無縮圖，純文字，無野需要處理，咁就一定快啦。 拿，同樣一首歌，一個介面咁，另一個貢樣，你揀邊個喇。
搜尋歌曲功能? 當然係無~~~輸入法就更加係性幻想，找歌只可以直接由頂轆到落底， 或者一頁一頁，用自己眼睛依據文字去轆出來吧。 圖中所見就是用一頁一頁的方式去搜尋歌曲，每頁同時示10個資料夾檔案。
Random Play 公平一點，無搜尋功能也無不可，很多朋友在街上聽歌時，都是用 Random Play 方式播放 ( 包括我 ) 難道一邊行路，一邊搞部機咩，就算唔計是否安全，自己都覺得麻煩啦， 咁既然最後都係 Random Play ，無縮圖，無搜尋功能，又如何? 但話得說回來，有得用唔用，和想用無得用係兩回事， 我由 AK120 換成 AK240，其中一個吸引力，都係因為佢有一個更好的操作介面吧，容許我又長氣，對我來講 Hi-Fi 唔只用來聽，仲要用來睇架。
Playlist Playlist 方面，在某一首喜歡的歌曲上，長按十字鍵超過兩秒，該首歌可被加入 Playlist 裡面，算係方便的加歌方式。 但只可建立單一個 Playlist ，做多個都無，但就算做到一個，跟其他國磚一樣，無得修改歌曲先後排位次序， 所以 Random Play是必然的設定了。
搖控 QA360 能接駁音響器材，這時搖控就會比較方便一點。 QA360 可額外購買一個接收器，如右圖所見接上，就可以用到搖控，由於Yesun沒有這個需要，所以沒有購入。
利用QA360 的同軸與RCA接駁音響器材作為訊源，其能力也討人喜歡。
同場加映當然是最重要的流動播放表現啦，當日用上了 V- Moda M-100 與 Bose SoundTrue ， 作為一部流動播放器，提供足夠的推力，聲音絕對收貨並有出色的表現，值得一讚。
個人評價 大家是否介意她在格式上只能對應 24/192 PCM 和 DSD64 嗎? 大家係聽音色，唔係聽格式，規格唔夠強係唔係就判死刑呢? 播其他無損格式是否好聲都唔再理會呢? 就算實用性強到可直讀 SACD ISO 都唔計算在內? 你手上有很多好聽的 DSD128 歌曲必需經常播放 ? 直讀 SACD ISO 功能，對某一些用家，基本上係非常重要一項功能，得到 SACD ISO 檔案後，要處理很麻煩， 碰上爆開後歌曲變成亂碼又要處理，得個搞字，直讀 SACD ISO 功能，完全解決有關問題。 我相信很多人覺得這功能，比起能播放什麼連曲目都講不出的 DSD 128，256 更重要。 唔知係咪未夠完美的關係，暫時不是所有的 SACD ISO 都能100%完全可成功直讀到， 有些SACD ISO 播不到是有機會的，唔知廠方是否能解決到呢?否則呢個對某些用家來講的強大賣點，時得時唔得，又係得物無所用。 QA360除使用DAC：CS4398晶片外，圖中所見的 Low Jitter 同樣是她重大賣點之一。
如果理智地以盲眼測試，無論是DSD或其他無損音樂檔案的表現，以國磚來講，我絕對會投 QA360 一票，難怪 Yesun 也喜歡這機。 這機在無損格式裡 WAV 的表現最好，如果唔介意的話，整個 Database以 WAV為主是這機的最佳格式。
但 無錯，總會有但....... 作為一個AK240用家，無可能接受到 QA360 所有在操作上的零享受，無縮圖， 無搜尋，無插播，Playlist無排序........ 加上 Hi-Fi 唔只用來聽，還要用來睇的大前題， 她外觀成部上世紀產物........Sorry應該係遺物先對，單係呢條己經係我腳下死罪吧。
我喜歡AK240並不單單只是喜歡她聲音，操作介面和功能同樣對我來講也非常重要。 文章一開始我早講過，以AK240用家心態去試 QA360非常不公平。 就如一個法拉利用家去試一部新款客貨Van一樣。
我相信大部份人都不會好像我咁膚淺以貌取機，只係我個人問題， 何況用 2萬零 800港元與幾千蚊部機比? 兩者價位相差五倍價錢，實際嗎?
有機會去試聽 QA360 係咪我所講到咁靚聲呢? 聲音收貨的話，你會滿意的。
淘寶賣幾錢?
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。 |
