|
AK 120 Out左架喇~~~ 發佈日期 : 2014年 2 月20日 圖 / 文 : 巴斯
由一月初 Astell & Kern最新旗艦機 AK 240 在美國CES亮相後，由傳說中的 $2萬 9千港元， 直到現在正式售價為 2萬零 800港元，短短只是一個多月在香港行貨正式發售。
當然 AK120 不會停產，但論型號數目字，論價位，論功能，論UI，論晶片............ 一一都可以見到 AK 240 是輕易取代 AK120 ，成為 Astell & Ker 新掌門。 AK 120 Out左架喇~~~ 终可見到AK 240真身，實物比我幻想中無咁大部，透過以下AK120與Note 3作比較，可大約猜想到實物大小， 另外顯示唱片封面比我想像中細，我幻想是全畫面封面的。 圖中可見，雖然 AK 240 顯示屏有 3.31吋，但原來出封面時並不是全畫面， 唉~~~~白資仔，沒想起唱片封面不是長方形，何來全畫面呢?
AK 240 身軀設計到非常之多角，成隻變型金剛咁款，型得來帶點不羈就一定架啦， AK 120泊埋去，立即顯得敦厚老實，直接D講，咪即係老土囉。 但話時話起晒角咁款，有利蠱惑仔用來防身最佳武器。^^ 但放心，起角還起角，使用時不會有傷害性，因為一一磨了邊。
當日睇相，我以為 AK 240會比 AK 120 厚身好多， 實物並不是我所幻想，而且手感不錯，這是我意料之外。
兩萬多港幣一部流動播放器， 外殼用鋁合金 (Duralumin) 打做， 機背用碳纖，夠重料啦，否則點開口問買家要錢呢?
機身四邊佈局設計與 AK 120差不多，只是AK 120有兩個插卡位，而 AK 240只有一個。 這個插 Micro SD 位，可對應最高 128G高容量的卡。
唔好同我講用兩萬多港元一部流動播放機來聽MP3，用得AK 240的用家，一定係聽高清檔案格式，就算唔係 DSD 音樂檔，都最基本無損格式掛， 呢類檔案體積都有一定程度大，廠商當然想到這一點，所以首先把 256GB 容量殖入體內， 如果唔夠用，可插上最高支援容量 128G 的 MicroSD 卡。 內置與外置容量，數下手指加起來，即係最高 384GB ，無奶由唔夠用吧。 提提無手甲的朋友，如果按卡出來時要小心，因為這個是彈射設計，快手按的話，佢會彈射出來，有機會唔知飛了去邊度， 點解我會知，因為我就係那個傻仔囉，嚇到我呢，真係飛得好遠，依家講返起個心仲樸樸跳。
首先每次開機都要Load一段時間，用開流動播放機的朋友都應該理解的。 如果用手機播歌的運作方式去比較的話，會好唔適應。 不過讀卡需要一點點的忍耐， Load 完之後你想點跳點飛都無任何問題，只係在起初要等佢 Load 一次先咁解。
萬一想取出 SD卡，正確移除是有必要啊。
心急朋友，無做上述程序， 有機會見到呢個字眼架，所以都係小心為上。
全新為AK 240寫過的 UI 介面，操作方式雖然與AK 120差不多，但 UI 樣子是完全不一樣的設計。 不過放心，就算不是AK 120的用家，依然是易上手操作。
Home 鍵 拿，就好似紅圈呢個位置，同手機一樣係 Home 鍵來的， 你話幾親民呢，所以我話唔難用，就係咁解喇。
Native DSD 兩萬多港幣一部流動播放機，強項之一是用上兩粒 Cirrus Logic CS4398 晶片，獨立處理左右聲道， 能做到AK 120都做不到的 Native DSD 硬件解碼，最高能對應 5.6MHz DSD 音樂檔案。 這一點，AK 120只能把 DSD 轉成 PCM 輸出，而不能做到 DSD Native 輸出。
MQS Streaming 功能 AK 240 另一強項就是提供 MQS Streaming 功能，簡單來講，是串流播歌。 即係 AK 240 透過 Wi-Fi ，播放家中電腦或NAS內的歌曲。 韓國官網正提供軟件給用家Download到電腦安裝，Mac 和 PC版本都有，在電腦一方運行這軟件，AK 240就可以讀到該部電腦內的音樂檔案， 播放所有AK 240支援音樂格式，當然包括大家最關心的 DSD音樂檔案吧。 不過當日我真黑仔，目的地 Router 經常斷線，試唔到呢項功能，激死人。 其實我好想知道咁樣播 DSD ，會否暢順呢? 可以跳播嗎? 快速前後會有問題嗎? ................
圖為AK 240 Wi-Fi功能開啟下樣子，配對一次家中網絡，咁今後在家中同一個網絡下電腦， 只要安裝該軟件，AK 240就可以播放該部電腦裡的歌曲。
如果用家唔想接線到電腦傳送音樂檔案，呢個 Wi -Fi 功能同樣可由電腦把音樂檔案 Download 落AK 240。 另外也可以直接在 AK 240 操作介面上，透過網上買歌都得， 不過幫襯開網上買歌或 app 的朋友都知，以 iTunes 為例，假設用香港戶口， 在美國或日本的歌或 app係咪比錢就買到呢?答案早就知有區域所限，無法用香港戶口買到的。 AK 240買歌都一樣面對呢個問題，暫時AK 240只有泡菜國和魚生國有呢個 AK 240 直接透過網上買歌功能。 香港? 香港係國際大都會，你話買就買咪好無面，伸長條頸等下啦。 Download 下來存放位置，當然可以放在指定機內位置吧。
LINE OUT 在早前發放預告影片裡，可見到音量，除可以透過右手邊實體鍵轉動調校，還可以透過直接撥畫面來達到效果， 因為實體鍵轉動得比較慢，好像我呢D長期趕住去死的人，係無耐性等她轉咁耐， 直接撥畫面會快達到目標位置，非常方便好用的設計，值得一讚。 另外圖中可見到LINE OUT鍵出現在畫面，用家如果想一步到位，可直接一手篤落呢個鍵。
首先當然因為怕誤按，所以有溫馨提示吧。
同意按確定之後，就會自動輸出大音量，方便輸出去其他器材上。
國內朋友，請用以下視頻收看 http://v.youku.com/v_show/id_XNjc0ODg0ODY4.html
L/R 平衡調校
圖中可見操作介面提供 L/R 平衡調校，大幅度卒又得， 一下一下咁慢慢篤又得，快速一步歸位更無難度。
國內朋友，請用以下視頻收看 http://v.youku.com/v_show/id_XNjc0ODg0OTYw.html
EQ EQ 是如圖所見樣子，個人口味一向都不太喜歡用 EQ， ( Note3 例外，因她聽歌實在太差效果，配合 Power Amp 呢個 app，加上她的EQ，使 Note3 起死回生，所以一定要開 ) 用開的AK 120並不需要用體內 EQ，我自己如何去調校，總覺得不用 EQ最自然，最好效果。 來到 AK 240 身上也是存在同樣的基因，我也不用這個 EQ部份。 當然，有得用唔用，和想用無得用係兩回事，所以AK 240依然有提供 EQ 功能就係咁解。
國內朋友，請用以下視頻收看 http://v.youku.com/v_show/id_XNjc0ODg1MDgw.html
與AK 120一樣，在選歌期間，是沒有唱片封面縮圖出現， 當播出該曲目時，先會出現唱片封面吧。
全球一體化，加上音樂無國界，內裡的曲目文字， 理論上是國際化，韓文，日文，中文應該完全出到。
但~~~~~部份日文是有機會變成亂碼，但只是個別出現， 絕不是日文出唔到，因為在其他檔案裡的日文是正確無誤顯示出來。 我相信這些小問題，是很容易透過韌體更新得到解決。 另外每首歌播完之後都會有好大的( 得 )一聲，有點像黑膠跳針的聲音， 這些小問題，我同樣相信很容易透過韌體更新得到解決，一點不擔心。
中文搜尋 在操作介面額頭向下拉，可以見到這個捷徑操作介面， 最頂部位置，可見有搜尋功能，要找歌曲就方便得多了。 咁當然，手機一早有這功能，唔係什麼咁巴閉，但手機以外的流動磚，算利害架喇，起碼萬元級別的 AK 120 都無丫~~~~
除手機或平版電腦外，以流動播放器來計，可以用中文搜尋，AK 240可以講係前無古人了。 圖中可見，搜尋時，除英文字母外，還提供 速成輸入法，這點對找出中文歌曲或歌手好重要， 但無奈我不懂得這輸入法，得物無所用。 手寫輸入法 ? 咪玩啦，唔係智能手機啊~~~ 實Q!!!!!有人搞事!!!!!
排序播放 你知現在地球上的人類，同一時間唔會做單一樣野，他們同一時間要做兩樣野或以上先得安樂， 他們自己本身都要 Multasking ，何況對器材的要求? 假設用家聽緊 喜歡你 這首歌，一邊聽一邊在機上找其他歌曲，當找到 你把我灌醉 這首歌時，可以用如圖的方式拖拉去播放清單 排隊， 你把我灌醉 可排隊成為下一首自動播放，即係播完 喜歡你 這首歌，下一首歌就自動播 你把我灌醉。 這功能當然可以一首首歌一直排下去都可以，總之想播邊首，可以安排插隊放在下一首又得，放在 隊尾 又得，得左!!! 呢種排序方式，並不只是單一首歌曲，如圖所見，整個專輯插隊都係零難度。
平衡輸出 AK 240另一個大賣點當然是提供平衡輸出，呢點對一些喜歡用來推大食一點的耳機用家最希望擁有功能。 但可惜這款 2.5mm TRRS 插頭全平衡線材，暫時市面上未有提供發售 ( 不過我估好快有售 ) ，幸好這日Yesun有一條 DIY線可暫借一用， 用 Philips X1 來欣賞，反而使我有小小喜歡這耳機，清翠的樂器聲音，使我對這個效果加分不少。 但以這方式推動 Philips X1，我以為是推到彭彭聲，事實上我需要把音量推到超過 3/4 先有效果， 我在幻想，如果推更大食的耳機，我覺得未必應付到，但話得說回來，流動播放器如果可以推到大食耳機，咁買座台大機的人豈不是白痴? 某程度上不要對流動播放器抱有過份要求，何況先唔好講是否推得動或推得好，講得流動，唔通有人會帶隻
Sennheiser-HD800出街咩。
線路輸出與平衡輸出，在機上可見到其切換鍵。
國內朋友，請用以下視頻收看 http://v.youku.com/v_show/id_XNjc0ODg2MTUy.html
就是因為Yesun 有DIY這條轉換線，我先可以接上比較大食一點的耳機去試。
附件還提供圖中所見的意大利皮套。
殖入 3250mAh電池 體內殖入 3250mAh電池，官方話可連續聽 11小時，不過借機給我的那位仁兄唔生性， 交到我手時，能源只有35%，我花時間在拍照，拍片和了解這機的操作後，她告訴我就快無電。 呀Q一點想法，上手對我好好喇，如果交到我手是 1%，豈不是連影相都唔夠時間? 何況因為唔夠電，我先可以影到呢個畫面嘛，充滿電先給我，就影唔到呢個畫面架喇。
個人評價 整體所見，AK 240 的的確確是取代 AK120的寶座，成為 Astell & Kern最新旗艦機，是鐵一般的事實。 AK 240 聲底與 AK 120同一口味，喜歡AK 120的朋友，一定會同樣喜歡 AK 240。 由於價位是高達 2元 800港元， 21張金鈔，就算日薪 $1000， 唔食唔用都要做 21日先夠錢買 ，何況我呢D最低工資外省民工 ? 再講，單附上機價係無聲出到的，因為未有耳機，用得 AK 240， 無奶油用 $300 貨色的耳機去欣賞吧，咁可能最後要三萬元先可以得到應有的聲音出來， 這點也是我沒有把AK 120換成 AK 240 的最大理由。 講到 Native DSD 硬件解碼 ，我個人對DSD檔案可有可無，因為曲目關係，我喜歡歌曲都沒有DSD格式， 我聽歌而不是聽格式，所以這點不是我針對項目。 在AK 240裡聽過幾首 DSD 格式的歌曲，的確是AK 240音色上佔優，其清澈與細緻度都得到討好人的感覺。 而非DSD音樂檔案，我又唔見得 AK 240的音色，勝過舊作好多，多到我要換機。 不過話雖如此，如果錢唔係問題， AK 240 現在應該成為我新寵。
各師兄與朋友，這篇文章，如非商業用途，歡迎轉貼再轉貼，如需借圖片使用， ◆ avbuzz.com精神，人人毒我，我毒人人 ◆ 謝謝收看這篇文章，你是第 個收看這篇文章的讀者。 |
Video 
