新寵-AvBuzz

新寵

發佈日期 : 2013年 11月20日圖 / 文 : 巴斯

再一次提醒大家，無乜事千萬唔好多手搞人家新玩具，保証中招。

在 Yesun 手上接過他的新寵 Sony RX10 ，

與 RX100II 一槎用上的 2020 萬畫素 1 吋 Emxor R CMOS 。

無論拍片與硬照，都是在我一直用開的 NEX- 6 加 18-200 mm鏡頭質素之上。

所謂之上，是以我平日作為工作機之用，無論是操作上，或是成像結果。

以工作機來講，全完解決我所有問題，試完之後，零籍口唔買。

這日剛好約國仁交收物品，順手一起去接新寵回家。

這機只推出幾日，又唔係什麼名機，應該一街都係貨，

於是今次試下唔幫襯百老匯，改去蘇寧，丫~~店員居然話無入呢隻貨，非常沒趣。

唯有死死地氣去百老匯，還是百老匯八字比較夾我，一問即有。

國仁第一時間當然貼上飛鼠幫吧。

有無得平?

傻啦，幾千蚊買部相機仲要問人有無得平? 借借啦，唔好阻住後面條人龍。

送小小紀念品打發我就有，以下就係除了相機之外，送出的紀念品。

不過咁，唔係所有紀念品都無用架。

例如屏幕保護貼，副廠電，32GB SDCard 呢三樣對我來講真係有用，

尤其副廠電，外面離廠都百幾銀一粒。

不過呢隻大膠腳就.............相信我有生之年都唔會用得著佢喇~~

第一部給我驗機，我感覺好似係比人開過 ( 完全係我個人幻覺 ) ，

店員為確保我安心，專程去倉，拿給我另一部驗，感激~~感激~~再感激。

驗完，無任何問題，安樂晒~~~

贈品保護貼，本身免費，仲幫手貼埋，唔該晒。

我呢類手工藝一向零分的人，無可能會識得貼吧。

留意上圖有塊濾鏡嗎?

由於我一向唔慣用鏡頭蓋，剛巧在床下底找到一塊 62mm的 UV濾鏡，順手帶來裝上去。

店員好好人，明明唔幫襯他買濾鏡，我自己帶來都幫我裝上去，裝之前仲用壓縮氣清理，小弟感激流涕，店員對我真好。

返到屋企，當然係影返輯開箱圖鑑呢~~~

請問..........信封上面的地址，筆劃好似唔夠數咁? 我睇來睇去都睇唔明，

細個唔比心機讀書，現在字都唔識，要儉討一下。

不過咁，D字唔係比我睇，係比郵差睇的，我睇唔明唔緊要。

頂層就係上述物品，接下打開下層。

下層就係主角與附件擺放位置。

主角用一塊黑布包著。

附件就係呢一堆，看到那個好出名的充電火牛嗎?

出名什麼 ? 出名充得慢囉，所有Sony用家都見識過，龜速充電火牛，最出名係佢。

有留意到左下角的跟機原廠電嗎?

好眼光，正係NEX系列的相同電池，非常合我用，我的NEX舊電，可以兼容喇~~~開心死。

登登登~~凳各位觀眾，佢就係我的新寵 RX10 喇。

換鏡?

無架，工作DC機一部，無得換鏡。

拿~~~呢個就係我一向最憎見到的不透明鏡頭蓋，又無繩，開了個蓋都唔知放邊，擺得兩擺就唔見埋，多謝晒~~~

你話點解鏡頭蓋唔係透明架呢? 唔透明，點用啊~~~

打開鏡頭蓋就見到佢的靈魂之窗，我用相機好粗，尤其工作機就更加，

那些二手口吻，三年鏡，九成新，一定唔會發生在我身上。

但總不可能由得佢就咁使用吧。

剛巧床下底找到塊透明蓋，又剛好是 62mm，一於用佢做透明鏡頭蓋吧。

首先新寵的鏡頭係用呢個字掛帥，而我舊有的 18-200 mm 並不是呢個級數。

呢點先勝一仗。

舊有的 18-200mm 鏡頭，光圈 F/3.5-6.3，

而新寵係 F2.8-16，所謂最大光圈 2.8

係恆定2.8 啊~~~

另外舊有的是 18-200mm 鏡頭，

相對 135 Full Frame 是 28mm- 300mm ，而新寵是 24mm- 200mm

新寵在 Wide方面佔優，

Tele方面雖然新寵是短了，但由於恆定光圈 2.8 質素補貼，我還是喜歡新寵，又勝一仗。

呢部機好著重拍片功能，

所以這鏡頭是屬於電動對焦，使用直接驅動 SSM 超音波摩打，Zoom 起來超隱定。

光圈環底部有開關鍵，用家手動光圈環時，可以選擇轉動時有一格格的手感和聲音。

或者選擇無段靜音，拍片時轉動光圈環，就不會受聲音所影響，

確實是一個非常實用貼心功能，又勝一仗。

NEX 電

留意電池位與 SD記憶卡位置並不放在一起，她們是分開獨立房間。

換卡在機身側邊出入，萬一上了腳架後，要換記憶卡也不會影響提取角度。

下圖所見這機是使用跟 NEX 一樣電池，使我換機過渡期更加開心。

在其中一次日本之旅時，在當地為NEX電池購入了能摺合的電源插頭，

完全唔阻位置，無論收藏在行李內，又或者使用時，都一樣咁省位，無得彈，電源線永別了!!!!!

現在換相機，呢個咁好用的充電器，唔會成為廢物，開心加開心。

USB充電

RX10提供機身 USB充電，根本就無需要充電器幫手充，正所謂求人不如求己，自食其力。

咁當然唔會用跟機來的廢柴火牛啦，改用iPad好力火牛，再配合純銅淨充電線，好快充完。

如圖所見，充電期間亮起橙燈，餵飽後橙會自動關閉。

用iPad火牛或5V2.1A火牛充電.是我個人咁做，冇任何官方提意用家咁做，我自己更加唔建議任何人咁做，

因為有機會輕側燒機，重側爆炸，我自己咁做，只係我個人問題，其他人看後得啖笑吧。

反 MON

今時今日，個Mon無得調校角度，你用埋我份都得喇~~~

上次影希慎廣場，唔係因為有反Mon，我無可能做到呢類構圖。

新寵當然同樣提供同一調校角度的Mon吧，這個 3 吋 123 萬點當然唔可以好似佢D遠親咁調到自拍吧，

但最起碼現在的上下調校我夠用了。

跳燈

今時今日，連手機都有閃燈，自稱相機的，無奶油無閃燈吧。

但就不能像她遠親 NEX 機系跳燈一樣了，她不可以屈角度，跟普通的跳燈一樣吧。

多功能熱靴

先生，跟埋閃燈一起買嗎?

貴 ? 咁家中有無其他牌子的彈鏡反光機外置閃燈丫??

如果有，唔理Nikon又好Canon都好，九成都可以接上在這個多功能熱靴上使用。

TTL ?

咪玩啦，唔同廠點可能仲有個性化的 TTL 技術 ?

用人手調校閃燈輸出吧，零難度，方便到無朋友，簡直係做福人類的設計。

當日由 NEX-7 轉成 NEX- 6 其中一個最最最最重要的理由，就係NEX- 6有多功能熱靴，幸好新寵依然有這項功能，

咁我升級不是白廢啊，開心加開心。