毒害小輝輝 ( 二 )

發佈日期 : 2011年 9月17日

 小輝輝是誰

當年未有Blog，更加無Facebook，要分享大家屋企的器材，就要靠大家電郵來，給我機會轉貼在主頁。

小輝輝當年是知道巴斯呼喚而投稿，數數手指是 2002年的事了。

他當年仲一先一後投了兩次之多，想重溫昔日小輝輝的投稿，可Click以下兩個連結得到重溫。

雖然我收到稿件並貼出主頁和大家分享，但唔代表我認識小輝輝，直到多年後，小輝輝成為城中人像攝影高手之後，

他的知名度很高，而且我好喜歡他的作品風格。

在一次外影中，我以Fans身份與他結識，後來我找返資料，先知道他原來一早就有投稿音響器材的稿件給我貼出。

哈，世事就係咁架喇。

上回講到小輝輝被奸人毒害，第二日就飛奔去省城撲V-Link和無線路由器，

留意小輝輝要進一步達到較佳的 CAS效果，並不是照上次毒害佢時所用的器材，而係用真真正正以電腦作訊源。

所以他需要一部電腦和一個 USB to SPDIF 轉換器。

上次離開時，推介了國仁力讚的 V-LINK 轉換器作為目標物，所以小輝輝就向佢埋手喇。

留意單據上日期，係 8月3日，正係代理加了新價的期間，

小輝輝雖然唔識人有荀價，咁唔代表佢就要用正價買到呢件貨，

最終在旺角某店鋪，用舊價買到，不過張單就要照正價寫。

幾多錢?那裡買?  哈......同你唔係咁熟，唔講你知 ^_^，不如你問小輝輝丫( 如果佢肯答你的話 ^_^ )。

由於 V-LINK體積小，而且又唔需要接火牛或電源線，

收藏方便，自然就放在刁架桌面上就可以了。

把V-LINK 接駁 Macbook Pro 與 Denon  100週年 Av amp 之間，就是這套 CAS主要的硬件接駁方式。

上次離開前，我只係指手劃腳一輪 ( 其實我自己都唔知自己講乜 )，聰明的小輝輝就完全了解CD數碼化的程序，

包括洗碟，轉檔，縮圖........最後傾倒去一隻 2.5"硬碟內。

小輝輝有接婚紗攝影的工作，相信大家都有見過他的精彩作品吧，如果你真係錯過的話，下面條 Link 可幫你得到重溫的機會。

http://www.fotop.net/siufaifai

他平日Macbook Pro都會跟身外影，現在順手用埋來做 CAS ，一毫子都唔需出，真係開心呀，呢D咪叫物盡其用囉。

請原諒我一次又一次咁長氣，對我自己來講，CAS的重點，係可以用 iPad來操作播歌，

透過其縮圖，不但一目了然地見到不同款式的精美封面，而且一步到位地篤歌名，就會播出該首曲目，

我覺得發明咁樣選歌，真係可以得到諾貝爾和平獎囉 ^_^

Macbook Pro 以 USB輸出，接到 V-LINK身上，再以光纖或同軸接到 Denon 100週年 av amp去。

就咁用 Macbook Pro 作為訊源，當然唔夠啦，

 在 iPad / iPhone 裝上免費的 Remote apps ，咁就可以利用 iPad / iPhone 操作到 Macbook Pro 播歌架喇。

正所謂痴痴呆呆座埋一台，身為院友的小輝輝，又點會唔喜歡用呢種方式操作呢? 

所以小輝輝購入人生第一個無線路由器，用來給Remote之用。

由於小輝輝工作比較忙，暫時只能完成他手上一成CD數碼化，不過單單一成，小輝輝都玩得好開心架喇。

努力呀小輝輝!!!!!有人來你家探訪，就係靠你感染其他人，所以要快手啊。

你睇，用 Macbook Pro 做 CAS 幾型，播歌期間，仲多了一個放大封面睇到，Pro好多呀。

如果唔喜歡見到封面的話，Remote apps操作介面上，有個 screensavers 鍵，篤一下就有靚靚 screensavers 出來閃動。

再唔係，連 screensavers 都唔想見到的話，可以咁樣丫.............

配合 Denon 100週年的 2.1效果， 整體效果很滿意，尤其聽慢歌，

不過如果播放大動態的曲目， Sunfire HRS- 8 低音炮表現，就唔係我能接受到的效果，起碼在這個空間我唔接受，其他都收貨了。

初步吹水，小輝輝也有意換去這個低音炮。

整個過程，小輝輝只是花了錢買路油器和V-LINK，就可以在聽歌方面得到咁大樂趣。

眼見小輝輝咁喜歡 CAS 的表現，我自己都覺得好開心呀。

小輝輝忽發奇想， 如把 Sunfire HRS- 8 低音炮，放入書房用，效果是否一樣好呢 ?

如果好的話，咁佢就可以安心長放書房，客廳就可以購入另一個適合的低音炮了。

於是小輝輝就出手了，把 Sunfire HRS- 8 低音炮搬來書房，

並放在圖中所見的位置上一試效果。

唔...........大師級攝影作品，都係在這個房間作後期處理，好型呀!!!

而且個顯示屏仲係富貴牌子添呢 ^_^

大家平日所見他的精彩攝影作品，就係用呢幾枝鏡頭拍出來架喇。

你睇。有料的人，唔需要搞到通屋鏡頭，都可以有好的作品，反觀有些人，一屋都係鏡頭，叫佢交張相出來睇，嚇死人，大有人在。

容許我講少少題外話，大家有無睇早前明珠台所播放的鏡頭下的奧巴馬 ? 係講美國總統奧巴馬貼身攝影師的工作。

條友仔在咁重要環境下，都只係得兩部相機在身上，而且無需直度手柄，真係型到爆。

最利害就係佢D相好得，仲會在白宮內展出，問佢最滿意係邊一張作品，佢........居然話明日果張，

天啊!!!!!!有無再答得型D呀?佢直頭係我偶像啦!!!!!!

睇返自己，每次影相搞到好似走難咁，過程中，仲要把鏡頭換來換去，

人地唔知仲以為係什麼世紀大製作，回想自己的所作所為，真係人唔笑狗都吠。

無錄到呢個節目的朋友，可以問朋友借來重溫，如果你喜歡攝影的話，一定會喜歡這位攝影師和這個節目。

好喇，有感而發之後，講返家訪內容吧。

一對 KEF 鋼琴木 LS3/5a 全球限量版，放在桌上，係咪好有品味呢，

而且呢個版本，仲有號碼跟添，呢對係幾多號? 你話呢? ^_^

以前呢對喇叭，係如圖咁平放在桌上聆聽，

由於小輝輝覺得如果放上腳座，無錯一定可以放高到耳的水平位，但他無法接受配上腳座後太醜樣，所以無用腳架，就地擺放。

但單元就咁平放在桌上，和耳的角度差好遠..............

最後小輝輝想到用圖中所見的腳，只用一粒，就可以優化呢個角度問題。

把單元角度，向返耳的角度，

當然呢個唔係最好方法，但小輝輝覺得比用腳架來講，無咁醜樣 ，

而且小輝輝平日只用她作為上網或處理作品時背景音樂之用吧，無需咁執著。

你睇，用了之後，角度改善，而且又美觀，哈.....聰明的小輝輝呀 ^_^ 。

好喇，講返書房用2.1聽歌，真幸運，小輝輝桌面上所用的迷你 Amp，是有低音炮輸出的，

咁樣，他就可以利用呢個迷你組合做到 2.1效果了。

書房點可能無電腦呢?而且小輝輝是 iPhone用家，電腦內有 iTunes 是理所當然的事，咁豈不是係CAS啦。

於是電腦聲效輸出，就可以接去JVC迷你組合，再以 2.1重現聲音。

結果呢~~~~~以書桌組合來講，當然好正啦，平平無奇的 2.0，又點可能敵得過 2.1呢? 

基本上聽過一次都返唔到轉頭，現在只好等小輝輝選購一款低音炮給客廳用， Sunfire HRS- 8 低音炮就會進駐書房架喇。

下集預告...........小輝輝的軟庫

硬件講得七七八八喇，唔好以為咁就講完，因為小輝輝的CD碟珍藏，確實是大開眼界，有很多都是絕版的珍藏。

就好似圖中所見的夢劇院，下集再和大家見面丫。

Bye Bye~~~

一

各師兄與朋友，這篇文章，如非商業用途，歡迎轉貼再轉貼，如需借圖片使用，

請自便，但敬請不要抹去圖中的 avbuzz.com簽名字樣，感激感激再感激。

◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。