蔡琴 “不了情” 演唱會DVD
讀者投稿
發佈日期 : 2007年 6月17日
圖 / 文 : 譚威威
aa2.gif){kind=small}
最近買左蔡琴 “不了情” 演唱會DVD，嘩！好睇到不得了，我呢個懶鬼想唔寫Ｄ野都唔得！
記住，呢張DVD既畫面真係靚到飛起，Ｄ聲又靚到無倫，唔買點止係一個損失，直頭係人生一個大遺憾！
DVD一套三隻，一共34條 tracks衹賣一百六十幾蚊，並且包裝精美，真係一Ｄ都唔貴。
聲效方面，此碟有
Dolby Digital Stereo Karaoke, Dolby Digital Stereo Vocal, Dolby Digital EX 6.1 Vocal
及我最喜愛既 dts Surround Sound 96 / 24。
此碟有太多好歌喇，多到我都不知從何說起…………….!!!
蔡琴在演唱會中盡顯真功夫，唱live毫無破綻，當今個Ｄ當紅哥仔姐仔呀……學野就係學呢Ｄ喇，
咪搞到個演唱會好似個馬戲團咁，而Ｄ歌就唱到………………唉！
我老豆一邊睇一邊笑說：“蔡琴好野，完全唔洗請嘉賓坐陣，由頭到尾都係一個人。
或者無人蠢到願意與蔡琴同台演唱啦，以免自曝其短、等同自殺。”
雖然衹係一笑，但含意頗大呀！
講講歌曲，就講點題歌 “不了情”，個白色Yamaha大鋼琴加上蔡琴小姐既動人歌聲，
整段演譯感情非常豐富有如水銀瀉地，聲音、畫面皆靚到絕。唔好理邊個係原唱(雖然顧媚小姐已唱得不俗)，
我覺得最有資格唱 “不了情” 衹有蔡琴一人，從音域到意境，此曲就似係為蔡琴度身訂造。
蔡琴唱 “不了情” 可謂衹此一家，別無分店。
講另一首我愛到發燒既歌係 “最後一夜”，聽完蔡琴係演唱會DVD中既完美演譯後，
我又心思思要再睇番白先勇既著名作品 “金大班的最後一夜”，中學既時候睇過，仲做埋讀書報告添。
事隔多年，想唔到今次會主動再睇……..又另一番感受。
話說回來，我敢講DVD中的 “最後一夜” 遠勝其他CD版本。
我係屋企搵到兩隻CD作過比較，沒錯，無論在感情和技巧上都殺哂，無得爭論。
當聽蔡琴唱到 “我也曾陶醉在兩情相悅” 既 “醉” 字同埋 “我也曾心碎於黯然離別” 既 “碎” 字，
那份情感立即把我拉倒，我企唔穩！蔡琴唱此曲時非常投入，
我發覺當她唱到 “曲終人散回頭一瞥” 時她真的睜大眼睛望向歌迷，
我心知她的情緒要湧上黎喇，果然唱到last一句 “嗯………最後一夜” 時她真的按不住了。
蔡琴唱 “往事衹能回味” 真係百聽不厭，一幕 “這是我小時候” 更絕！
我唔想用太多文字去講DVD裏面每一首歌曲，
但我個人覺得單係 “不了情” 同埋 “最後一夜” 兩首歌就已值回一百六十幾蚊！講真既，並無虛言。
另有一點我想講既係聽演唱會既歌迷，我覺得蔡琴演唱會既歌迷好有質素，
他們絕大部分都衣著斯文兼舉止大方得體，當蔡琴歌聲一出整個場館就靜晒，全部都真係黎為聽歌，真係好可愛！
當蔡琴和歌迷握手問候，所有歌迷都好有禮貌，
完全無其他演唱會常見既 “爭先恐後”、 “拉手拉腳”、 “扯頭扯髻”、 “發癲尖叫” 既畫面出現。
畫面所見，蔡琴和歌迷就似是多年無見既老朋友在互相問侯，場面好溫馨呀！
完全唔似得其他演唱會咁要用上一大班保安員！
呢套DVD好靚，於是我決定買埋套CD，方便我用HiFi房裏既 “嫁生”
去欣賞呢個咁正既演唱會。
唉，越聽越感到現今樂壇好難再搵到好似蔡琴呢類咁好歌既巨星咯，
啊……蔡琴小姐……妳是我心中永遠既女神呀！！！
近幾日我經常用半鹹淡既普通話大聲唱 “我也曾陶醉在兩情相悅………我也曾心碎於黯然離別…….”
“好核突呀，嚇死人啦爹Dee…….” 唉，我個寶貝女，無奈。
最後再提一提你，未買呢套DVD既話好即刻去買啦！
◆ avbuzz.com精神，人人毒我，我毒人人 ◆
謝謝收看這篇文章，你是第 個收看這篇文章的讀者。
|
|
|