蔡琴 “不了情” 演唱会DVD

　读者投稿

发布日期 : 2007年 6月17日

图 / 文 : 谭威威

最近买左蔡琴 “不了情” 演唱会DVD，哗！好睇到不得了，我呢个懒鬼想唔写Ｄ野都唔得！

记住，呢张DVD既画面真系靓到飞起，Ｄ声又靓到无伦，唔买点止系一个损失，直头系人生一个大遗憾！

DVD一套三只，一共34条 tracks衹卖一百六十几蚊，并且包装精美，真系一Ｄ都唔贵。

声效方面，此碟有

Dolby Digital Stereo Karaoke, Dolby Digital Stereo Vocal, Dolby Digital EX 6.1 Vocal 

及我最喜爱既 dts Surround Sound 96 / 24。

此碟有太多好歌喇，多到我都不知从何说起…………….!!!

蔡琴在演唱会中尽显真功夫，唱live毫无破绽，当今个Ｄ当红哥仔姐仔呀……学野就系学呢Ｄ喇，

咪搞到个演唱会好似个马戏团咁，而Ｄ歌就唱到………………唉！

我老豆一边睇一边笑说：“蔡琴好野，完全唔洗请嘉宾坐阵，由头到尾都系一个人。

或者无人蠢到愿意与蔡琴同台演唱啦，以免自曝其短、等同自杀。”

 虽然衹系一笑，但含意颇大呀！

讲讲歌曲，就讲点题歌 “不了情”，个白色Yamaha大钢琴加上蔡琴小姐既动人歌声，

整段演译感情非常丰富有如水银泻地，声音、画面皆靓到绝。唔好理边个系原唱(虽然顾媚小姐已唱得不俗)，

我觉得最有资格唱 “不了情” 衹有蔡琴一人，从音域到意境，此曲就似系为蔡琴度身订造。

蔡琴唱 “不了情” 可谓衹此一家，别无分店。

讲另一首我爱到发烧既歌系 “最后一夜”，听完蔡琴系演唱会DVD中既完美演译后，

我又心思思要再睇番白先勇既著名作品 “金大班的最后一夜”，中学既时候睇过，仲做埋读书报告添。

事隔多年，想唔到今次会主动再睇……..又另一番感受。

话说回来，我敢讲DVD中的 “最后一夜” 远胜其他CD版本。

我系屋企搵到两只CD作过比较，没错，无论在感情和技巧上都杀哂，无得争论。

当听蔡琴唱到 “我也曾陶醉在两情相悦” 既 “醉” 字同埋 “我也曾心碎于黯然离别” 既 “碎” 字，

那份情感立即把我拉倒，我企唔稳！蔡琴唱此曲时非常投入，

我发觉当她唱到 “曲终人散回头一瞥” 时她真的睁大眼睛望向歌迷，

我心知她的情绪要涌上黎喇，果然唱到last一句 “嗯………最后一夜” 时她真的按不住了。

蔡琴唱 “往事衹能回味” 真系百听不厌，一幕 “这是我小时候” 更绝！

我唔想用太多文字去讲DVD里面每一首歌曲，

但我个人觉得单系 “不了情” 同埋 “最后一夜” 两首歌就已值回一百六十几蚊！讲真既，并无虚言。

另有一点我想讲既系听演唱会既歌迷，我觉得蔡琴演唱会既歌迷好有质素，

他们绝大部分都衣着斯文兼举止大方得体，当蔡琴歌声一出整个场馆就静晒，全部都真系黎为听歌，真系好可爱！

当蔡琴和歌迷握手问候，所有歌迷都好有礼貌，

完全无其他演唱会常见既 “争先恐后”、 “拉手拉脚”、 “扯头扯髻”、 “发癫尖叫” 既画面出现。

画面所见，蔡琴和歌迷就似是多年无见既老朋友在互相问侯，场面好温馨呀！

完全唔似得其他演唱会咁要用上一大班保安员！

呢套DVD好靓，于是我决定买埋套CD，方便我用HiFi房里既 “嫁生” 去欣赏呢个咁正既演唱会。

唉，越听越感到现今乐坛好难再搵到好似蔡琴呢类咁好歌既巨星咯，

啊……蔡琴小姐……你是我心中永远既女神呀！！！

近几日我经常用半咸淡既普通话大声唱 “我也曾陶醉在两情相悦………我也曾心碎于黯然离别…….”

“好核突呀，吓死人啦爹Dee…….” 唉，我个宝贝女，无奈。

最后再提一提你，未买呢套DVD既话好即刻去买啦！

◆   avbuzz.com精神，人人毒我，我毒人人 ◆

　谢谢收看这篇文章，你是第 个收看这篇文章的读者。