圖 / 文 : 巴斯
歡迎來到 LamLan 50mm F1.1 MK2 下集,錯過上集開盒篇的朋友可👉 ( Click 我重温 ) 👈。
這是一篇個人使用感受而非評測文章,一來我沒有專業資格去指手劃腳,二來聞相也不是我個人喜好,何況一支 $1600 國產鏡頭,難道會勝過市面上名廠鏡? 我話係都無人會信吧,所以對我來講,LamLan 50mm F1.1 MK2 只需做到我所想效果便足夠了。
首張
第一張相基本上我都未準備好就 誤按 Shutter,居然嚇親自己,雖然其他人唔知點解我對這張垃圾相嘩然,但自己喜歡這感覺就可以了,其他人唔需要明白,何況正常人是無法明白一個傻的想法,所謂好的開始,成功的一半,第一印象良好。
大師講過,大光圈淺景深唔代表一切,正如首富話錢唔重要,女神話美貌唔係所有,大師竹木草石皆可為劍,手機直出都能影到奪獎,當然字字鏗鏘,點會用非技術下三流手法去呃 LIKE 呢 ? 但食物鏈底層的我,平日相片都係比人由頂轆到落底輾過,大師又豈會明白呢?
雖然大師覺得大光圈淺景深係旁門左道,但對我來講,就算呃唔到阿婆,最起碼淺景深能使我自我感覺良好,千門口訣有云,要呃人先呃自己,自己都呃唔到,點呃人? $1600 買淺景深花得值,唔通我單純因為 KamLan 係 50mm 手動定焦鏡而買佢 ?
無牙三姑同的士陳話佢地褲袋長期都有 f/0.95 ,仲話係 LEICA 天喎~~所以 KamLan f/1.1 又有幾巴閉?
對焦
起初擔心自己無法應付手動對焦,幸好 GM5 提供👉附助對焦功能👈,除利用峰值顏色來標示中焦地區,還能配合局部放大 ,大大減輕個人技術上失誤所帶來的錯敗感,另一方面,無段式的光圈環與對焦環,操作起來很是順暢,不會影響我操作時的手感。
在 GM5 設定內,提供三款不同顏色來標示中焦地區。
以這耳機成像為例。
在顯示屏幕上可見,會出現顏色紋提示正在中焦地方,唔中扭到中,睇住扭,扭住睇,手動對焦變得輕鬆。
如果依然覺得唔夠清楚,還可輕觸屏幕,局部放大來看中焦位置,劃公仔劃到出晒腸,仲要放大埋條腸,一向有幻聽的我都聽到部相機大聲叫按得Shutter 喇喂~~,難道連按 Shutter 部機都幫我做埋咩?咁就真係無晒尊嚴架喇,如透過咁多附助功能幫手都失焦,或者手動對焦真係唔適合我,放手吧。
最近對焦距離
這鏡頭最近對焦距離為 40cm,如好像我經常會把物件拿上手合照的話,又扮有型唔用腳架,迫自己單手握機,要看看手是否夠長,雖然機身頭重尾輕,由於光圈先決有 f/1.1 在手,ISO如果唔太底,快門唔會慢得去邊,鎖定焦距,用身軀前後移動代替轉動對焦環,單手握機按 Shutter ,如果物件細是輕鬆拍攝。
如果我👉堅持👈要用手拿著影全張CD封面,我的手必需要伸到最盡,而且要放棄看顯示屏,眼要爭取距離而緊貼著 Viewfinder ,方能緊緊提供到 40cm 最近對焦距之餘,還能見到我在拍什麼,其實這時我的頸部姿勢和手是很狼狽,多拍幾張我應該會傷到頸,咪係囉,咁做乜要拿著來影呢?放低佢啦天才,所以這張相可見是失敗的,一來手震,二來隻碟都出埋界,其實我影了三張,這張叫做無咁惡劣吧。
無可否認 LamLan 50mm F1.1 MK2 其 1.1光圈下所產生的散景很討好我。
這是手上器材,平日所沒有帶給我的樂趣。
不過就算沒有淺景深出現,其 1.1光圈也確實能在光線不足情況下幫到手。
基於大光圈情況下,不能要求有很高的銳利度,但我絕不會覺得是矇。
大光圈之下,無可否認背景虛化是有其吸引力,但代價一定不是鏡頭最佳表現 ( 廢話中的廢話 ) ,以下圖為例,如想表達訊息是帶出耳機之餘,同時能展示品牌、Serial Number 與產地來源的話,咁 f /1.1 反而是缺點。
只要願意收光圈,Serial Number 與產地來源便乖乖出現,視乎想表達什麼而定。
購入這鏡只是作為滿足一下玩手動鏡所帶來的樂趣,單是這點 LamLan 50mm F1.1 MK2 能滿足到我。
美中不足之處是我所用的GM5顯示屏是不能調節任何角度,大大影響我低角度拍攝樂趣。當然這是我或者GM5的問題,而不是 LamLan 50mm F1.1 MK2 問題。
由於蜜月期關係,基本上都鎖定在 f/1.1 光圈進行拍攝,以這相為例,如願意收光圈的話,成像一定比現在好得多,實在無必要無時無刻都全開光圈進行拍攝,始終手動定焦鏡對我來講是陌生的接觸。相信給我多一點時間適應會有進步。
GM5 配 LamLan 50mm F1.1 MK2 體積小,容易配合鎗袋跟身,我都有信心使用量高,這點真是需要時間去証明。
LamLan 50mm F1.1 MK2 手動定焦鏡是休閒玩物,帶來慢活攝影樂趣,絕對唔係工作伙伴。
我相信如果你係三舅父取妾待駐場攝影師,一定唔會用佢來搏命囉,我相信未上乳豬就嬲到打爆個鏡頭了。
今日我講喜歡 LamLan 50mm F1.1 MK2 是真心說話,但下月,下季,下年又如何呢? 手動定焦鏡真的可長期適用於我嗎?
蜜月期間,什麼海誓山盟天長地久的說話都講得出口,正所謂路遙知馬力,明年是否還見我用這鏡頭發相,便知道我對她是否真心。
:全文完 :