圖 /文 : 巴斯
近期熱賣的兩把充電直鈚 Bosch Go 2 和 WORX WX 240 ，經過人生交义點後，最終落實向 WORX VW 240 埋手，近日熟讀有關資料，如果 DSE 考 WORX WX 240 的話，我好有信心第一個交卷💪😁。
淘寶貨
出手前不難找到淘寶貨，售價雖然平過香港小小，但以人民幣結算，立即召集陳李張黃何，史廖林白蔡會計師樓 20人團隊進行計算，經過三日三夜不眠不休，得出結論是以人民幣結算後，匯價拉近港元售價，還要付出集運來港運費，運送期間要承受損毀風險，雖然可找順豐鏢局的鏢師運送，但大家知道順豐鏢局雖然有保障，但收費比較貴，何況隔山買牛無保養。
塞翁失馬
落實出手時，全港居然冇貨，分明針對我😡！拖著生意失敗 LOOK 步伐回家痛哭。沙士比亞講過👉塞翁失馬，焉知非福👈，正當我有自殺傾向時，東厰探子回報，本星期 WORX WX 240 會返貨，而且一口氣推出多3款之前未推出過的顏色，原來上天安排我買唔到係為我好，多謝！多謝！再多謝！感激！感激！再感激！抹乾淨口水鼻涕後，睇清楚千户大人的飛鴿傳書內容，提到膚色决定售價 ，原色$230，新膚色加$10， 嘩~~大拿拿$10，使我大失預算之餘，一時之間都唔知點調動咁大筆現金？
全新膚色
雖然最終我不是在這家深水埗鴨寮街達成購買，但我是透過她得知好消息，究竟點解唔推出 Iron Man 紅呢 ? 我覺得會好賣一倍囉😒，你呢? 你喜歡那一隻色呢? 如果女生一定想要粉紅色囉😁，不過冇喎！
開箱
連夜趕路出省城，一手交錢，一手交貨，其實 WX 240 賣 $240 好啱數丫，又易記，回家玩開箱，帶硬朗原廠紙皮盒包裝。
背面樣子。
開盒後可見再有一塊發泡膠保護內盒。
真身出現了，透過Blu-ray碟作比例，可大約猜想到實物大小，白色腰封除印有內附所有東西外，還帶出👉送禮👈訊息，邊個設計架，應該頒發諾貝爾和平獎比呢條友。
我就係見到呢個紅絲帶訊息，所以多買一盒送比 安倍晉三。
説收納盒像餐盒，我相信無人會反對吧😉，餐盒提供雙開關扣。呢隻顏色使我想起吉野家或大家樂，在新幹線上用佢來食鰻魚飯或和牛飯都不會被識穿囉！
腰封背部印有 WORX WX 240 各賣點和操作簡介。
拆開腰封便可見收納盒，透過磨沙蓋可看到內部結構，咁難得可以有新膚色選擇，我無奶油選元祖灰掛，👉翡冷翠👈是首選，轉凍飲都加$3啦，$10可換膚色，一定唔同你客氣。
收納盒是兩層設計，拿走第一層，底部出現暗格，可見有些東西存放在這裡。
是保養卡和葵花寶典。
葵花寶典屬於看圖識字，非常適合有閱讀障礙的我收看。
保養要填咁多野? 我有嚴重閱讀障礙，咁多字點填呀~~有無代客填表呢?
底部暗格深度不高， 應該放唔到假牙或者金磚，但欠單一定無問題。😁
留意下圖所見，收納盒蓋在按鍵位有防止誤觸功能。
如有雜物壓向盒面，這個設計會承受該力度，減少誤開電鈚機會。
除了 WORX WX240 主角外，還有幾位配角。
跟機配上約 1米長 USB Type-C to USB-A 充電線，但沒有提供USB電源插頭，Type-C 插頭冇方向性，方便我亂插都中，何況手機食完條線順手插埋比佢食又得。
Type-C 充電的好處唔一定局限堂食，如果趕時間，又或者身在户外，外賣帶走，邊行邊食都得。
圖中所見黑色身，5 CM長度帶藍環是屬於 PH2 類別衝擊鈚咀和長度為 6 CM 銀色帶磁延長杆。
另外，在獨立存放孔上可見合共 24 支長度為 25 mm 不同款式鈚咀，以3排每排8個陣列方式放在一起，利用6款不同顏色環，把24 支鈚頭分類，唔知以為玩緊 Mastermind 添😁
底部可見 24 支鈚咀被獨立存放，而且每個獨立孔都會咬實鈚咀，不易脱出。
24支長度為 25 mm鈚咀，直接拿出來玩點名吧~~~
藍色 PH類 6支
綠色 PZ類 2 支
紅色 LS類 3支
黃色 T類 5支
黑色 H類 5支
橙色 S類 3支
一目了然色環和類別鈚頭，全可透過長度為 6 CM 銀色帶磁延長杆一起工作。
收納盒提供手指位，使用家容易拿出，不過首次使用時要把札帶斷開，但這位置落剪不就手。
把她反過來剪會就手得多。
WORX WX240 機身本體長度為 18 CM，重量 260g。
3.5 CM 直徑手柄兩邊提供防滑橡膠。
鈚頭帶磁，無論接上衝擊鈚咀、延長杆或跟來的鈚咀，都是帶磁吸。
雖然鈚頭帶磁，方便吸著鈚咀，但不能使鈚咀帶磁。
尾部提供穿繩孔，但沒附上掛繩。
打開尾部防塵塞內是 Type C 充電口，宣傳話如空肚餵飽 1.5 Ah 的 18650 電池約需要 90分鐘。
大家熟識的 18650 電池，是以她的直徑和長度命名，18 代表 18 mm 直徑，65 代表 65 mm長度，0代表圓柱形電池，很多小電器，尤其流動風扇仔都是用上她，大家一定不會感到陌生。
👆電池是來自電筒的跟機電，用作今次合照之用，WORX WX240 是不會比用家自己拆出電池的。
手柄尾部是操作區，先看上面的箭咀鍵，正與反按壓鍵，使用時需要長按來保持轉動。操作區下半部，提供3檔扭力度調校，按鍵不是輕觸式，需要用力按下切換，扭距為 5 NM (硬扭)，2.5NM (軟扭)。
如長按 3秒，可顯示剩餘電量，新機未至於空肚，但顯然未食飽，試機無問題，但打算首次就安排國家級任務比佢，就唔該餵飽佢先講喇。
帶磁夾頭雙LED燈防遮擋設計，在工作時自動亮起，15秒累計自動關閉。
WORX WX240 在圓身的設計，加了防滾動切面，使鈚身不是一個正圓，大大減少為防止電鈚自己玩側手翻的可能，不過用家如刻意推動，她依然可以轆來轆去的。
機身上除印有產地來源外，還有提供最高轉速為每分鐘300轉與 電池電壓 4V 的資料。
我本身有電鈚，透過合照比例，你便明白我何解打 WORX WX240 主意了。
這類狹窄空間埋身搏擊，直鈚在手便可彌補曲呎鈚不足。
透過3口釘，一口氣鑽入木方內，配合3檔的設定，一停就收手，可見3檔的力度表現。其實以我呢類連鏍絲鈚應該轉邊個方向都搞不清楚的人來講，平日都只係用佢來收下鏍絲吧，難道靠佢起沙中線咩。
自備索頭
配件受制於 WORX WX 240 的六角鈚頭，所以另外購入索頭，使她能接上更多不同類形配件，選擇了這款能夾上 2 mm – 6 mm 直徑的配件索頭。
透過手的比例可大約猜想到實物大小。
六角頭接上磁吸頭上，替換方便，放心，吸得好實，唔會運作途中飛出變爆旋陀螺的，如果真係會變爆旋陀螺，分分鐘有得炒添😂。
雖然市面上配件，包括鑽咀，都有提供六角頭款式，但需要從新買過晒，有了這個索頭，平日用開的鑽咀，透過索頭轉換後便可用上，今後銅絲掃、全屬切碟，牙刷、珍寶珠、粟米，什至搞屎棍………都可索上，你話開心唔開心先? 現在 WORX WX 240 不單只是一支電鈚，還是一支電鑽。
呢個世界無咁如意，接上索頭後，代價就是索頭直徑擋到後面照來的LED光線。
把房燈全關後，用跟機的配件是可輕易照清楚目的地位置。
但用了這索頭後，就會發覺兩支 LED 無法照到目的地去，不過相比起能利用到索頭接上更多配件，無燈用又有乜所謂呢。
售價 $24 港元配件，佔 WORX WX 240 機價10%，可以接受丫。
加/消磁器
上文提到跟來的鈚咀不帶磁，如果用家真係覺得咁樣是帶來不便的話。
可購入這個加/消磁器，我知唔係新野來，無野搵野來講咁解遮，無需用電，又唔需上鏈，上面消磁，下面加磁，拿著鈚咀入去劃幾劃就得架喇，鏍絲鈚當然都可以用吧。
鈚咀劃完之後立即攝到鏍絲，雖然唔係好強勁，叫做有囉，唔通可以吊起架貨櫃咩。
幾錢? 淘寶 $7人民幣，鴨寮街幾錢? 👉$19港元。
配件盒
跟來的餐盒比較大，不適合走佬，用配件盒代替後就輕鬆得多，機身會花? 工具係要來用，而不是陳列品，工具滿身傷疤先夠型，有經歷，一條疤痕一個故事，皮光肉滑咁款，佢自己都冇存在感，何況其他工具都睇佢唔起吧，哈~~估不到這個膠盒居然可以放得入直徑 26 mm 的索頭，度身訂造一樣。
呢個膠盒幾錢?自己睇丫，邊度買? 👉鴨寮街。
延長杆
一直用開的延長杆很長，跟機來的延長杆可彌補中距離盲點範圍。
:全文完: