圖 / 文 : 巴斯
有要求
明年4月終，平成年號便結束，今次應該是平成年號最後一次日遊。早前到深水埗鴨寮街順道買數據卡，向老闆表明來意，第一志願是 7日使用，大約 2-3GB用量，3G/4G上網，需要 wi-fi 分享，最重要當然是必需上到 Facebook ，上到 Facebook，即係其他都無問題 ，講完。今次照舊光顧公廁前呢間賣卡專門店，老闆介紹其中一款卡給我，多謝 $95。
老闆就係介紹我用呢張卡，日本DOCOMO 4G LTE 7天/35GB+限速無限「3香港」漫遊上網卡。其實唔一定要去鴨寮街，呢類卡一街都係，落街買又得，上格價網格完再去實體店買又得，唔就腳的話，幾平都和我無關，所以去開就順手買。
點解包裝上面有道符架?上面印著……..
食用日期
附費前，最重要睇清楚背面食用日期，萬一買了過期卡，無仇報啊~~~ 食用日期 2019年底，明明係 7日擁有7GB流動數據用量，但前面道符寫著，如在2018年底前用，就可享有 7日擁有 35GB用量，咁荀? 7GB變成 35GB? 不過優惠期得返兩個星期，哈~~正適合我。不過話得說回來，7日內無可能用得晒 7GB ，給我 35GB 又如何? 咪自欺欺人吧。
35GB數據流量
我在香港月費計劃只係施捨到 5GB，呢張卡35GB ？足夠半年使用量了，乜解救去幅射國7日有35GB咁多？仲話係4G ，其實我3G都接受到啊，有冇伏架？佢聲稱無須登記及設定，左下角大大隻字寫住一插即用，只需打開數據漫遊便可使用。
無限上網
上述提到用完上限 7GB 或 35GB後，就無限上網，所謂 ( 無限上網 )，是指降低及限制數據傳輸速度(上載及下載)至不低於128kbps，嘿~~~大家知道呢個速度跟上唔到網無乜分別，不過，我在香港一個月都用唔晒基本5GB ，去7日旅行又豈會用到35GB咁多呢 ? 所以128kbps ( 無限上網 ) 與我無關。
開封分享
係咪如老闆所講，做到我所有要求的種種功能呢 ? 唯有去到日本先知了。無買後備卡理由係今次全程在市區流浪，而不是郊外，就算中伏，求其跳入一間 Bic Camera 都有卡買到，只不過無咁抵用咁解遮，以下先來個開封分享吧，這是卡的正面樣子。上述提到的符，兩個星期後就無效了。
背面提供使用說明。
打開後是如圖這個樣子，無其他不必要印刷品，右手邊是APN 教學。其實理論上係一插即用，佢會自己找適合網絡，但你知意外呢家野好難講，萬一手機自己找不到，咁就唯有自己手動設定APN，所以出現右手邊的錦囊。
大部份手機皆會自動設定APN，如沒有自動跳轉APN，請手動設定：mobile.lte.three.com.hk。另外呢張卡不設增值，亦不支援語音及短訊服務，又如何?
可見這張 Sim 卡可分成 Normal Sim，Mirco Sim 和 Nano Sim 。
開機入卡，雙卡雙待的華為 p20 pro 所用是雙面卡槽。
當你見到呢篇文的時候，我應該到達了日本領空，如果早上你見唔到我在 facebook 吠的話，一係我墜機，一係張卡係伏，或者因我用華為機入境而被捕，總之無死到就寫埋下集吧，有緣再會…….