圖 / 文 : 巴斯
出走日本8天，上星期到深水埗鴨寮街順道買數據卡，向老闆表明來意，第一志願是8日使用，大約 2-3GB用量，3G/4G上網，需要 wi-fi 分享，最重要當然是必需上到 Facebook 啦，上到 Facebook，即係其他都無問題，講完。老闆聽完話$80啦，多謝老細~~~~ ^^
老闆介紹呢張卡係中國聯通 – 日本8日通話/上網卡，其實唔一定要去鴨寮街，更加唔需要指定呢張，外面呢類卡一街都係，落街買又得，講返呢張卡，上格價網格完再去實體店買又得，只係不同地點有不同售價咁解。包裝上所提到 $138 只是建議零售價，官網售 $90，而市面上最平見過 $70 有交易。
無限上網
呢張卡的賣點是 :
日本8日4G無限上網卡+20分鐘通話
20分鐘通話 （內有一個可飛線香港號碼 可致電日本，香港及中國）
使用 Softbank 網絡供應商
可分享網絡
Nano、Micro、Normal SIM三合一
所謂無限上網，其實是指首3GB數據流量達4G，之後只提供 3G限制數據傳輸速度(上載及下載)不低於128kbps。嘿~~~大家知道呢個速度跟上唔到網無乜分別，不過，我在香港一個月都用唔晒基本5GB ，去8日旅行又豈會用到3GB咁多呢 ? 所以128kbps ( 無限上網 ) 與我無關。
包 HK$20 通話費
此卡唔單只提供上網，還提供 HK$20 通話費，可於日本使用話音通話，最長可用 20 分鐘，雖然話音功能與我無關，但有得用唔用與想用無得用係兩回事。
開封分享
係咪如老闆所講，做到我所有要求的種種功能呢 ? 唯有去到日本先知了。無買後備卡理由係，就算中伏，求其跳入一間 Bic Camera 都有卡買到，只不過無咁抵用咁解遮，以下先來個開封分享。
背面提供條款。
附費前，當然最重要係睇睇背面食用日期，萬一買了過期卡，無仇報啊~~~
打開後是如圖這個樣子，左手邊是APN 教學，其實理論上係一插即用，佢會自己找適合網絡，但你知意外呢家野好難講，萬一手機自己找不到，咁就唯有自己手動設定APN，所以出現左手邊的錦囊。
其實最主要都係開啟數據漫遊同埋 APN 輸入 3gnet，兩款死對頭的不同設定如下。
可見這張 Sim 卡可分成 Normal Sim，Mirco Sim 和 Nano Sim 即係通吃。
雙卡雙待的 LG V20，側面用作擺放這卡的位置。
當你見到呢篇文的時候，我應該到達了日本領空，如果早上你見唔到我在facebook上吠的話，一係我墜機，一係張卡係伏。如果唔死得就寫埋下集，如果真係香咗咁呢。。。。就。。。噢撈！