圖 / 文 : 巴斯
出走日本7天，上星期到深水埗鴨寮街順道買數據卡，向老闆表明來意，第一志願是 softbank 網絡，7日使用，大約 2-3GB用量，3G/4G上網，需要 wi-fi 分享，最重要當然是必需上到 Facebook 啦，上到 Facebook，即係其他都無問題，講完。今次光顧圖中右手邊呢間，收費 $95，多謝老細~~~~ ^^
其實唔一定要去鴨寮街，呢類卡一街都係，落街買又得，上格價網格完再去實體店買又得。
7GB 數據流量
老闆介紹下圖這張由3香港推出的日本專用漫遊卡，使用DOCOMO 4G LTE 網絡，7天提供 7GB/數據流量 + ( 無限上網 )
嘩！7GB ？我在香港月費計劃只係施捨到5GB，乜解救去幅射國7日有7GB咁多？有冇伏架？佢聲稱無須登記及設定，只需打開數據漫遊便可使用。上面大大隻字寫住一插即用。雖然唔係我第一志願 softbank 網絡，仲話係4G ，其實我3G都接受到啊，希望無問題吧。
無限上網
上述提到用完上限7GB後，就無限上網，所謂 ( 無限上網 )，是指降低及限制數據傳輸速度(上載及下載)至不低於128kbps，嘿~~~大家知道呢個速度跟上唔到網無乜分別，不過，我在香港一個月都用唔晒基本5GB ，去7日旅行又豈會用到7GB咁多呢 ? 所以128kbps ( 無限上網 ) 與我無關。
開封分享
係咪如老闆所講，做到我所有要求的種種功能呢 ? 唯有去到日本先知了。無買後備卡理由係，就算中伏，求其跳入一間 Bic Camera 都有卡買到，只不過無咁抵用咁解遮，以下先來個開封分享吧。這是卡的正面樣子。
背面提供使用說明。
附費前，當然最重要係睇睇背面食用日期，萬一買了過期卡，無仇報啊~~~
打開後是如圖這個樣子，無其他不必要印刷品，右手邊是APN 教學。其實理論上係一插即用，佢會自己找適合網絡，但你知意外呢家野好難講，萬一手機自己找不到，咁就唯有自己手動設定APN，所以出現右手邊的錦囊。
大部份手機皆會自動設定APN，如沒有自動跳轉APN，請手動設定：mobile.lte.three.com.hk，另外，呢張卡不設增值，亦不支援語音及短訊服務，又如何?
這是卡背樣子。
可見這張 Sim 卡可分成 Normal Sim，Mirco Sim 和 Nano Sim 。
雙卡雙待的 LG V20，側面用作擺放這卡的位置。
當你見到呢篇文的時候，我應該到達了日本領空，如果早上你見唔到我在facebook上吠的話，一係我墜機，一係張卡係伏。如果唔死得就寫埋下集，如果真係香咗咁呢。。。。就。。。噢撈！