圖 / 文 : 巴斯
全城熱賣
近日 Yesun 又電話又短訊問我是否對近日爆紅的 X-mini SUPA 藍牙喇叭有興趣，藍牙喇叭一街都係，點解呢款咁出眾呢? X-mini SUPA 體積細細，不但大聲，最大賣點係有環繞聲效果，用來打機睇戲好有視聽感覺，Yesun 要我去聽聽，佢話我會喜歡，咁了解我 ? 無幾耐，雷霆救兵報喜又話佢在 香港影音博覽 場內買了SUPA，啊….連雷霆救兵也買了，我有理由相信呢部機唔會差，但我呢幾日唔會出省城，好痕啊~~~~點算好呢 ? 幸好黃昏約了朋友來我家聚會，打電話求救，希望朋友由省城買埋入來打救我就開心死了。
正價
官方建議零售價 $1390，除了楊過會咁老實，試問邊個咁傻標 建議零售價，店鋪門口價當然貼上正價，公平競爭法之下，仲要用正價來買玩具? 有數講是常識吧，朋友為我行了兩家店，最終光顧呢間，唔好問邊間喇，唔通人家平比我，仲篤人出來咁衰咩，何況呢個價都未必係全港最平，分分鐘係全港最貴我都唔知，介紹人去買分分鐘領野，正所謂槍打出頭鳥，何況現在D人好惡，我都係伸返個頭入去喇。
有圖有真相，標價 $1380，實收$1240 ，朋友為我節省 $ 140 ( 可以食好多個虛心樂園餐呢 ) 。
雖然唔知係全港最平定最貴買到，但都多謝朋友幫我奔走，當這個速遞員，其實即日正價買到現貨都好開心，現在平咁多更感激。
$1240行貨，包埋呢個我覺得好醜樣的機座，送埋平版? 當然唔係啦，平版用來做比例啊，比你激死。
首先開醜樣機座吧，移走外層紙套，盒內可見能被摺埋的機座，啊 ?原來摺得埋，又幾方便。
 |
 |
醜樣還醜樣，呢個金屬機座好重身，放上 SUPA 和夾上平版都唔會反或移位，絕對唔係偷工減料之贈品。
這個機座重量為 926g ( 約等於2磅 ) 。
這盒內還有圖中可見的說明書和配件。
 |
 |
更換配件可接上投忍雞或爽雞之用。
圖像化說明書，其實無都可以的。
 |
 |
跟來的六角匙，給用家調節機座角度，又幾貼心啊。
嘩，呢個座實在奇醜無比了吧，比都唔要，完全唔想正視佢囉。
 |
 |
主角登場
唔好再講佢了，接下來到主角出場。
 |
 |
個人覺得個盒底靚過盒面， 不過呢個構圖角度，睇唔到整部 SUPA 樣子又係事實。
完封包裝
到手發覺，SUPA 完封包裝，啊，原來朋友太心急幫我買，忘記要驗貨呢個步驟。有點汗顏……
 |
 |
盒身側面印上這機規格。
都係看官方網頁版產品規格詳盡一點。
單元： 52mm 單元x2
輸出功率： 10W x2
藍牙：藍牙V4.2（支援A2DP，AVRCP，HFP，HSP）
接收範圍：最長10米
續航時間：最長8小時
其他輸入： 3.5mm AUX in
其他功能：microSD咭音樂播放
支援音樂格式：MP3，FLAC，WMA，WAV，APE
體積：214mm x 104mm x 66mm
重量：960g
黑色 / 香檳金色
原裝行貨，一年保養
SUPA 正式開箱 ，移走紙外套見到內盒， SUPA 就在盒內。
 |
 |
SUPA 拿出來見真身，算靚仔，這也是我打佢主意其中一個理由。
市面提供土豪金……Sorry應該係香檳金，是但啦，反正我不會用，灰黑色是理所當然的顏色吧。
有人話 SUPA 樣子似 Naim 的 Mu-so，這個……..咳咳…….那個………
取出 SUPA 後，下層還有一個盒。
 |
 |
盒內是下圖所見四樣東西。
透過其他雜物和手握實物作比例，可大約猜想到 SUPA 實物大小。而實物有點重量，並不輕身，官方說 960g ( 約2磅 ) 足夠的手感，第一印像感覺良好。
背面一目了然輸入口，也可見到產地的來源。提供Micro USB 充電口，也提供 microSD 插卡聽歌，唔喜歡藍牙也可改用 3.5mm 接線。
SUPA 支援藍牙V4.2（A2DP，AVRCP，HFP，HSP），什麼 aptX 就無喇， aptX HD更加係性幻想。配對如常簡單，除流動裝置外， Mac 和 PC 都是零難度成功配對。
無論 SUPA 樣子是否像 Mu-so，我都覺得她很易融入我家擺設，就算四處放也不會難睇。
哈~~~我覺得最難接受的機座，原來放上 SUPA 和夾上平版後，見光地方不多，我現在又接受了她啊。
哈~~~她剛好和我一直用開的 SAMSUNG Tab S 8.4 一樣闊度，很順眼啊，而且露出來的彈力夾子我不反感，彈力適中，不需要跟她鬥力先夾得好。最重要係平版被夾在喇叭之上，不會被擋著，我正式收回上述提到覺得這機座醜的評價。
開箱完之後，對 SUPA 第一印像是滿意，但究竟聲效表現如何呢 ?
待續…………