9月尾收到風 OPPO 首部 4K/UHD 藍光機 UDP-203 即將面世，立即變賣手上自 2012年以 $4699 購入的 BDP-103，係 BDP-103 ， 連D都無架， 想唔到 4年後的今日，居然可以換到 $3000 ，即係付出$1699。（4年) 1460日 ÷1699元 = ( 每日) 0.9 元，唔需$1日。租都冇咁平啦下化？補少少錢就可以買到新機，借問聲，仲有邊部機做到?就算唔當 UDP-203 係一部 4K/UHD 藍光機，當係普通藍光機更新版都值啦~~~ 拿拿臨掘返所有配件出來，紙箱同發泡膠全齊。

朋友問我點解放售可 Rip SACD 特大賣點的一部機，我答佢我喜歡的歌手，唔知好彩定唔好彩，大部份都無推出 SACD，有 24/96 都仁至義盡。再者，就算真係百年難得一見推出的話，身邊最少有五位朋友擁有 OPPO 機，他們個個都可以幫我 Rip，當然包括埋問我呢條問題那位都是 OPPO BDP-103D ，所以根本無需要因為呢個理由而把機留住，換得錢當然換錢啦。

我要落訂
我唔懂得與人做二手交易，尤其現在惡人當道，我驚我自己受唔住會斬完人再自殺，寄賣是我唯一出售途徑，話就話以 $3000 寄賣，扣除 10% 手續費，收錢後篤了幾串魚蛋，睇套戲，撘幾轉車，買下六合彩，得返………唔係喇，襯自己仲清醒，拿拿臨把餘額拿去旺角聲耀全音落訂買 UDP-203 , 老闆~~~我要落訂，嘿~~~真係講你都唔信，老闆話暫時唔接受訂單，係呀，有錢都唔收呀，係現金! 係現金! 係現金! ( 亞媽話重要的事講三次) 。佢話要照顧還有貨尾的商戶喎，唔係下化? 乜仲有人今時今日仲未買OPPO的嗎? 係喎，接我部OPPO BDP-103 那個人咪就係其中一個囉。老闆話現在如果收訂即係斷人後路喎~~~咁我問佢幾時先接受訂購，因為我想成為省城第一批用戶呀，佢話到時通知我，我問佢部機幾時出，佢話都係到時通知我。你…..你…..你
啤~~~~~~~~~~~~~~

老闆唔肯收我訂，糧尾咁多錢放身邊，我有不詳的預感，不其然想起一句 :  冤枉來瘟疫散。