黑市醫生

這名店平日經過就多，入去就好少，名人入住名牌私家醫院，電腦世界也都一樣，今日入來，一定唔會係買機，用了6年的 iMac 27，上週一睡不起………三年 Apple Care 早煙消雲散！既然官方都唔 Care ，呢次仲唔流血不止? ~~~~>.<~~~~

在家中透過求助熱線，循例為 iMac 27 進行心肺復甦法 Common +Option+ P +R 救命鍵，一向有電腦黑仔王之稱的我，豈會咁容易按幾下 keyboard 過骨? 救命鍵當然起不了任何作用，唯有透過接線生順手預約入院，這日多謝華哥車我們來醫院，打算在戲院睇 寒戰2 ，實行邊睇戲邊等通知，睇完戲食埋飯然後接病人出院回家團聚，如意算盤就是這樣打吧。平日大家都是見慣薄得來有線條美的 iMac 機種， 2010 年厚多士出土文物大家應該早淡忘吧。

華哥放下我在目的地泊車去也，你睇我包到個病人幾咁實淨，醫院門外是雙黃線，我就是靠這個四輪轉向去到，15分鐘後……… 醫生確診這機是硬碟老化壞死，由於這機屬於 2010年石器時代產品，apple再沒提供硬碟器官為她更換，咁神奇? 硬碟都無Keep? 好難想像…………噢撈。

原來預約了都並不是第一時間埋去就處理，可能太多機要處理，我也等了約十多分鐘先到我，不過有得坐，又有冷氣，仲有得上網，無問題丫。

由於醫生驗出這機只屬硬碟出問題，其他機能都是健康正常，再無原廠硬碟替換，那就簡單得多，聰明的你一定想到借勢換 SSD 吧，256GB SSD 是我的選擇。身邊最少有五位朋友懂得幫我換，但你知道不單單換硬碟咁簡單，還要裝兩個 OS ，今時今日發個 Whatsapp 口訊，人家都覺得浪費佢時間收聽，我仲會夠膽叫人幫我換硬碟咁過份? 人家有空都休息一下啦，幫我裝OS? 唔好難為身邊的朋友喇，所以我好自然帶部機去找 DOCTOR X ，邊度? 一定係呢度啦，立即跳返上華哥部車，八千轉兩咪車 ….其實……八千轉兩咪車係去唔到目的地的 ^^ 嘩哈哈哈~~~放下部機開單，立即跳回車上去食飯睇戲，摘日再取。

呢個係蜜瓜，呢張係賬單，噢撈。

出院後還魂續命，換了 256GB SSD

除安裝 Capitan 外，還為方便自己使用，同樣裝上Win 10。

雖然今次死硬碟，但以電腦黑仔王的我來講，只換硬碟能救返整部機，實在太幸運了，試想想，萬一整部機報廢，我會好唔開心囉。 ~~~~><~~~在這裡非常多謝 apple 電話教學的工作人員，和那位負責為 iMac 檢查的職員，不但提供專業意見，而且非常有禮貌，仲教埋我單手拿 iMac 27 的正確姿勢，整個過程雖然我沒有 apple Care，但 apple 沒收取我分毫，最後當然不能不多謝華哥做了貨車司機，仲請食晚飯同睇戲，無言感激。換了 SSD 順手更新到 Capitan，仲有多一個 Win 10在內，感覺就好像女朋友剪了新髮型一樣，壞電腦反而覺得係樂趣，變態的開心。