2016年，一個無耐性的年代，無親友會有耐性在探訪期間於投影機畫面硬食整整一套電影軟件的，早年改為播放電影精華片段，但客人依然是沒有耐性困在漆黑一片的密室裡，那怕是拆肉去骨精華片段，玩手機，回電郵，發訊息，是他們15分鐘後的必然動作，咁點解還要迫人家去受罪呢? 咁年前就開始在光猛客廳播電視節目做背景，但2016年當大家聲稱唔睇電視的年代，拜年期間無奶油用電視節目來招待親友吧，於是過年前向我一直覺得唔惦的盒子埋手，其實我一向話唔惦的產品，通常都惦，而且仲超惦，就好似Batman : The Dark Knight Rises ，我個人覺得係廢到極點的一套電影，結果全人類拍晒手，遠唔講丫，講近，今年我睇完預告，再加上過去兩集的個人評價，覺得今年呢套係垃圾中的垃圾片，侮辱了幾位影帝和影后演技，尤其幾位影帝，但最後呢? 最後你睇預售成積何等理想，我強調係預售，唔係即場呀，本星期日，電視更購入第一集版權在電視上播放，可見受歡迎程度，所以再一次鐵証我眼光係有問題的。
可以退錢
所以我覺得盒子唔惦，各位一定覺得好惦，新年播呢D內容，就一定適合大家了， 在眾多盒子當中，我見大家呼聲最高的是 LeTV 盒子，又話免費半年英超，又話大量電影，又話投資幾多幾多製作，加上有兩三篇報導話點正點好，在腦場其中一家店見到，最重要係$399 有得試用，唔喜歡可以退錢，可以退錢? 咁得喇，就你啦。
店員叫我記得Keep單，到時憑單退錢，又睇下點，到時又唔知會唔會話乜乜物物，最終退唔到，不過呢D都係我小人之心吧，到時可能是順利退錢吧，不過就算退唔到都只係$399吧。廢話小說，立即開箱。
開箱後可見盒子和說明書。一年會員送的，半年英超到時生效又係送的。
 |
 |
配件在下層，一目了然可見就係得咁多，最最最重要係留意兩粒電池，係雜廠的，我唔中計，萬一漏出液體，搞壞了搖控，最終無得退錢，我咪無仇報? 改用正常金屬殼電池可以了，我唔開你送的電池。
 |
 |
透過手的比例可大約猜想到實物大小。
 |
 |
正面和背面的樣子。
 |
 |
實況
首先我自己試用了，不到15分鐘，我就開始講粗口，不停咁講呀講，最終我放棄，咁得喇，我講粗口，即係代表大家一定會用得好開心，以下時間就駁好晒，等親友來享用。終於等到親友來團拜了，當中有一位70後，平日喜歡行腦場，一直有留意各款盒子，但一次都無用過，每次都是看人家介紹，齋睇唔買。他一入門口就留意到這個盒子，當然開心，我立即把搖控交比佢操作，嘿~~~~以下時間靠佢了~~他說點解個搖控操作咁遲鈍? 我話唔係我做的，你問做的那個吧，適應了一大輪，還未選到他所想的，後來佢問我點解咁多大陸節目，咁 LeTV 係什麼背景，你清楚過我丫，唔多大陸節目，唔通最多日韓美劇? 你唔係以為會有免費 Netflix 任睇下化? 不過這機可播放 Netflix 的，但佢又話要比月費先睇到，我話 Netflix 暫時搞推廣中，有一個月試用戶口，佢又話得一個月，之後咪又係要比錢。明白，完全明白晒。咁 入面有其他韓國節目丫，佢又話唔合口味，咁…..電影得喇掛，佢又話睇過晒，搞了接近20分鐘，基於三個理由，操作超慢，節目內容太過大陸味，畫質並非預期高清畫質。講完，我同佢講，借比佢回家慢慢玩，佢立即Say No。最後點? 最後我咪用Magic TV 播以下呢D 節目比佢重溫囉，且~~~搞咁多野，最後咪又係睇TVB，仲睇到指手劃腳，睇完一集又睇一集添。不過大家都唔睇.TVB，無奶油會知道係林泳淘與朱智賢做主持吧。
 |
 |
 |
 |
 |
 |
峰迴路轉
正使用LeTV 盒子朋友們一定摸不著頭腦? 以上絕對不正常吧，於是年初五該店一開鋪，便拍門求助，証實黑仔的我在新年期間依然黑仔，這機真是有問題，店員立即一對一給我更換，新年流流，一開鋪換機，真是大吉利是，但我都唔想，回到家一駁上，當然如店員試給我一樣，正常過正常，首先是最最最重要的遙控操作是非常流暢，飛快程度可以說係得心應手，絕無任何投訴，是我個人標準之上的遙控操作反應。也就是因為反應快，所以之前去唔到第二頁或者下一頁，現在都快速到達，所以現在先能見到整個應有介面和選項。進入所有 app 或 官方頻道，都非常清楚了解並快速試用到所擁有內容。個人感到很滿意，這日剛好有家庭聚會，今次親戚有兩位小朋友，當然又拿她們做實驗，結果10歲的小朋友拿著遙控操作，選取了20集麥太扭花臣睇晒，係呀睇晒 20集呀，勁~~看到兩位小朋友狂笑，呢$399值回票價。後來把遙控交到她們爸爸手裡，我只作簡單介紹操作，他就選了成龍主演的警察故事第一集，一邊睇一邊回憶當年在那間戲院睇，套戲當年對他來講有幾勁，非常開心，他反而對中日韓美劇集一點興趣都無，後來他再自選了星爺的破壞之王，但睇了三份一就因為食飯而唔再睇了。2016年似乎真係盒子先吸引到訪客，而且還要由他們自己選擇，而唔係由主人家選播，世界真的變了…………..而我自己，不錯我是非常滿意遙控的反應，內容不是反感，但也不見得好吸引我，加上畫質也不是我個人標準的高清畫質，極其量也只能屬於DVD畫質。但 $399 港元一部機，其實想點呢? 何況這機為客人帶來歡樂和吸引力，點都會搞下，所以我決定唔退款，$399 也確實是值得留低：起碼多一個媒體選擇。