周星馳執導兼監製的美人魚，在內地上映8天，票房已衝破20億元人民幣，果真利害，昔日周星馳主演電影，今日對我來講只能重溫，他所執導的電影對我來講也只屬一般，過年前看美人魚預告片，來到這幕便嚇走了我，沒有心機再睇。
農曆年過後，朋友聚會，熱鬧的說要一起去看美人魚，千萬個不願意的我，還是不想扮另類，無奈入場， ( 萬幸不是賭城風雲3 )。
講起美人魚，很難忘記 Barbie 夏尉喻當日為吸引周星馳所拍的自我介紹片，真係唔知點形容，我仲以為佢無可能入選到美人魚，嘿，最終都可以比佢入到，所以唔好睇少女生的力量。相信大家都有睇過呢段片，想重溫可到以下連結收看。
最後如圖所見，最右手面一字眉做形，就係佢爭取到的角色，並有一句對白講，她後面那位係……….^^
真正第一女主角係佢，林允 ，平平無奇得好緊要，入場觀看便能了解何解找一位平平無奇的女生去做這角色，我可以講是絕對正確，非常合理。林允 的演出一般，做到應有的表現，起碼不會反感。
全片做得最最最好係鄧超，可能他在四大名捕演的冷血實在太冷關係，早前我非常討厭他的演出。但今次他所演的有錢佬，演得非常好，我開始喜歡他了。
瘦身後的張雨綺很是吸引， 表現也很好，演得出那個角色的味道來。
片中不時播出兩首歌，一首是由 鄭少秋與 莫文蔚演唱的口水歌世間始終你好，雖然我唔明白，好多時都在唔關事場合播出呢首歌，就係為了好聽，為播而播? 定係放錯位呢? 反而我喜歡由周星馳自己作曲和填詞的國語歌曲無敵，尤其編曲部份，一聽再聽，鄧超主唱簡單易上口，好聽。相信大家都應該聽過不少次，透過以下連結可得到重溫 :
個人評價
片長 1小時33分 ，長度一般，我跟自己講，我入場不是因為周星馳，係因為一套叫美人魚的電影而入場，咁係咪會好一點呢? 結果係好一點，全片我唔覺得悶，但又唔會覺得精彩，只是一套很普通的電影，也沒有笑位使我覺得好笑，有些位也是在昔日周星馳電影內容出現過，例如主角想做一些事，做來做去都做唔到的搞笑位，我感受到是周星馳的風格，但我唔覺得好笑。整體屬一般電影，但我強調不是一套爛片，最起碼係有用心去拍的一套電影，只係我覺得一般吧，而這電影發出強列的環保訊息，值得大家去三思，出碟時也未必主動去看，有咪順眼睇下囉~~而我也沒有後悔入場。