每次來到日本，都會食不同種類雪糕，7-11 又有，抹茶軟雪糕又有，香港反而小食，今次來日本，天氣很冷，豈會有不食雪糕的理由呢?
尤其季節限定版，我食過! 我真係食過! <<<<<<<<<<嘩哈哈哈~~
夏天打邊爐，冬天食雪糕，是自然界 ( 電劣 ) <<<<<鄭中基腔，雪糕當然襯零下食吧，難道夏天食嗎? 輕井沢氣溫-7度，軟雪糕在店外比店內硬啊，越食越硬，要食快D喇~~正所謂襯熱食就係咁解喇 ^^
講到雪糕，當然係同鄭秀文一起食…….Sorry打錯字，應該係張秀文一起食先對 ^^ ，邊個係張秀文? 唔……..難怪，大家都唔睇電視，無可能知邊個係張秀文吧。唔重要，我有睇就得啦。可以同張秀文一起去金澤食金箔軟雪糕，你話幾開心呢~~我發誓。一直幻想跟她一起的~~~^^
這一家就係張秀文在電視介紹過的箔一，正是有售金箔軟雪糕店鋪喇。外觀好簡約，跟浮誇的金箔軟雪糕，不一樣的感覺。
來到大門口，便見到宣傳牌上介紹的金箔軟雪糕，佢話限量，但無講每日限賣十億個，定係十個，佢咁講，我們咪咁聽囉，咁認真做乜呢? 每個891 円 ( 即約$58港幣 ) ，嘿~~比起形象插水G字頭雪糕更名貴，咁當然啦，有整塊金箔啊。2016年，平野無人要架。越貴越要搶，越平越無人要，G字頭雪糕之所以插水，咪就係無端端衰賣得平囉，之前一向賣得貴都無事，一賣平就出事，千真萬確的定理。你睇日本 7-11平價威士忌無人買，免稅店貴20倍就搶住要喇~~~鐵証。
覺得 891 円食一個金箔軟雪糕肉痛? 唔緊要，如圖所見，可以食金粉軟雪糕，平好多架，只需450 円 ( 即約$30港幣 ) 就有交易，無用丫，正如我所講，平係無人買的。
唔知點解，成條龍都係男生排隊買軟雪糕，女生去了那裡? 而且他們全是買金箔軟雪糕，我就見唔到人買金粉軟雪糕囉。
嘿~~~金澤盛產金箔，原來女生都專注後面的金箔護膚品。難怪難怪。^^
其實入這店鋪之前，我在街口其他店鋪都有見過這些付有金箔的護膚品。
你看女生們多開心的在選購金箔護膚品。
言歸正傳，收銀處有金箔軟雪糕樣版，且~~~樣子和海報並不一樣，咁~~~究竟實物似海報定似這個樣版架?
未貼上整片金箔前，軟雪糕也有灑上少量金粉。
金澤食金箔軟雪糕，並不是這店專利，其他商店都有，我之所以推介呢家，除了是鄭秀文….噢撈，我又打錯了………除了是張秀文介紹過，最重要係這裡所提供的燈光，這一角是給顧客在這裡享用軟雪糕的位置，日本人不喜歡在街上邊行邊飲食，這是非常不禮貌行為，所以這裡提供室內就地進食。這裡吸引我的正是提供一個超靚的混合光源，磨沙窗透入冷色溫天然光線，而室內射燈又剛好是暖色溫，冷和暖兩種色溫同時出現，正正就是我個人最喜歡的混合光源，再加上店內佈置以紅色和金色為主，在拍攝金箔軟雪糕特寫時！提供一個良好背景，絕對是一個優質拍攝場地。
各位觀眾~~~~一生人必食一次的金澤金箔軟雪糕。一整片金箔放上軟雪糕，加上現場提供的光源和背景，好震撼啊。
咁矜貴，當然係相機食先啦，不過大家話咁係唔尊重食物，咁你食先啦，我影完就會食架喇，你食丫~~唔好影喇，當然食緊要過影啦~~食啦，唔好等我呢D唔尊重食物的人了。
如果覺得金箔顏色單調，可以向上望，會見到這一把紅傘，企在這紅巨傘下，紅色會投映到金箔上面。
影多幾張先開始進食。
喂~~~影快一點喇，開始溶了
店員有為客人提供小膠匙，方便容易進食~~~
我豈會一口吞下整個金箔軟雪糕呢? 當然是一匙又一匙的品嘗。
哈哈哈~~~途中發現唔知是口腔熱力或壓力，金箔被燙入到膠匙表面，再也不能移走，好搞笑呀~~~純天然燙金呢 ( 有點嘔心 ) ^^
金箔軟雪糕終於食完了，餘下雪糕筒~~~~
筒都好好食，又好好影，開心。
個人評價
總的來講，金箔軟雪糕的味道，以日本雪糕來講屬普通正常軟雪糕味道，食的是山長水遠來到這裡的特式，我個人覺得，金澤金箔軟雪糕，一生人總要試一次，一次之後? 一次就夠了。起碼可以同其他人講，我食過! 我真係食過! ^^ 金箔軟雪糕對我來講，影相比食更開心，如果一直覺得相機食先是不尊重食物的話，請不要試，因為這個軟雪糕並不會為你帶來很重的金箔味或者好吸引的回味感覺，起碼我唔會打算要多一杯 ( 不是因為錢的問題 ) ，真沒添食的必要，加上金箔本身很薄，唔會有咬口，食完好像沒食過。打算齋食唔影相而得到891 円 ( 即約$58港幣 ) 純口味回報享受，我個人唔見得可以達標吧。
