從名牌貨回歸國產耳筒

恭介 讀者投稿 　

發佈日期 : 2006年 6月24日

　
對於返工要搭長途巴士既我，自從發生「巴士阿叔」事件後，我更加鍾情搭車途中聽聽音樂，仲一定要用內耳式耳筒方可。

結果，我第一隻內耳式耳筒，係 SONY 的 MDR-EX51SP，韓國製造。

我無格價，二百多元買回來，換替我第一部 MP3 機的原裝耳筒，一直都用得好開心，

因為戴得舒服，又隔到一定程度既街上噪音，而且音質也可以，所以我沒有投訴。

不過，我們這類「傑斗」們既 PAT PAT，總是耐不耐就非常痕。見很多玩耳筒的朋友都選用 SHURE 的產品，

而且我的確又見到唔少名星響演唱會時，又真係戴住 SHURE 耳筒喎，證明它就算唔靚聲，隔音都有返咁上下！

於是又突然好留意 SHURE 產品，才知原來幾貴，最貴既一隻「耳筒仔」索價三千幾元！

真係唔講得笑，幾靚都係假，於是左度右度，一於決定買最平既 SHURE E2C。

玩過 SHURE E2C 內耳型耳筒既朋友都應該知道，SHURE E2C 真的好似一隻助聽器，出街時我都幾驚被人誤會係弱聽人士，

而且耳筒線好硬好粗，耳筒既重量亦不輕，原裝既膠粒戴得好辛苦，要換上海綿先舒服一點，不過海綿又好似易舊，

對於油耳仔既我，用兩個月唔夠就要換了，而更換，係需要百五蚊一次過買五對，的確唔平。

不過最要命既係，我後來轉用了 iPod Nano，唉，一時被 Nano 個靚仔樣吸引住，又忘了原來 Nano 既輸出好弱，

於是 Nano 根本推唔掂 E2C，唔單止要開到差唔多四分之三音量先夠聲，而且低頻真係唔多覺，高頻又去唔盡。

但係衰就衰在，E2C 的人聲真係好靚好舒服，層次亦乾乾淨淨，隔音又隔得好好，的確又幾吸引。

直至幾個月前，有另一個朋友介紹我用內地製的小型 USB 充電的 Headphone Amp，唔插尤自可，一插之下，

嘩！E2C 好似變成第二隻耳筒咁，高低頻返番晒來！連細節都特別出！我到果陣時先至知道，原來呢 D 先係 E2C 的威力！

我二話不說開口問佢借來玩下，點知玩左一個星期就知出事，因為 Nano 可以細到袋響褸袋，但係一加隻 Headphone Amp，

真係變到好似部陳年 Walkman 咁大咁重，真係唔係好方便，左右做人難添。

早排見到 SONY 出左隻 EX90，賣六百有找，好似話 (淨係日版) 好掂，又話拍住 Monitor 的大耳筒，

又靚仔，搞到我又再一次 PAT PAT 痕，點知出左第三日走上去銅鑼灣東角 SONY，賣鬼晒要訂！

我最怕訂貨，最好一手交錢一手交貨，即刻有得玩最開心，於是決定唔訂同埋走人。

帶住失望既心情，我閃左去九龍灣德福某唱片鋪，入面都有好多耳筒仔，我梗係又忍唔住行入去望望，

在眾多耳筒之中，一隻 Creative 既耳筒吸引住我。呢隻就係 EP- 630 喇。

老實講，再買耳筒，梗係想買靚聲D，更重要係要易推，同埋最好就唔好咁鬼貴啦。

其實 EP-630 根據耳筒網民一族估計，八、九成係一間內地既廠家「漫步者」H260 既 OEM，

呢間廠據估計重同時為 SHARP 既 HP-MD33S OEM 添，我唔知傳聞係咪屬實，

但係耳筒個樣就真係似足九成九，但係事否屬實與我無關。

總之，PAT PAT 極級痕既我，名知隻 Creative EP-630 深圳華強北路賣 268 人仔，而 H260 賣 205 人仔，仍然心急地以 298 港銀入貨！

重要個收銀姐姐衰衰咁話 EPS 機壞左，焗我碌卡添！

心急到咁，梗係一出店鋪門口就拆包裝開聲…H260…唔係唔係…係 EP-630 真係好輕身，不過條線比較長一條過，

又無得掛頸，不過都算喇，戴上耳仔先！隔音明顯無 E2C 咁好，唔理咁多喇，開聲先…

「登登登登…」我用 Nano Ramdom 選歌，今次係部 Nano 咁多次隨機選曲最令我緊張既一次…第一首竟然係「ROSSINI」玩野咩？

播据雞咁考機？咪住咪住，枝小提琴點解好似幾好肉咁既？聽多首先！「MY LOVE、MY FATE…」嘩，「胃藍」把聲生返咁多既？

呢個時候，我已經走左出德福德藝會外面，貪果度比較靜，再聽多幾首…「MOTO」嘩！BoA 既歌，點解 D 低音多左咁多？

咪住！真係太多喎！我呢個時候先至發覺，因為原本用開 E2C 唔夠低音，所以我在 Nano 入面既 EQ 較左「Bass Boost」，

而家關返佢，低頻都好夠。跟住一首歌接一首歌，陪住我搭巴士返屋企，好開心！因為呢隻一 D 都唔起眼既 EP-630，表現真係唔錯。

返到屋企，繼續唔願除低耳筒，繼續聽，一時好奇，將佢插入 AV AMP 度聽下 CD，再同 E2C 比下，點知…E2C 在 AV AMP 推動下，

又回復氣力了，係咁易聽下 Kidd 姐、琴姐呢 D HiFi 歌，E2C 完全不貴吹灰之力將 EP-630 技術性擊倒！由此證明，其實 E2C 真係靚，

但係 Nano 唔夠力推佢，變左更加易推既 EP-630 得到優勢，反而重好聲添。

好奇之下，查查耳筒的規格，其實我好少去睇耳筒既規格，因為我嚴格上唔係耳筒迷。

OKOK…原來 E2C 靈敏度都有 105dB，同 EP-650 的 106dB 差好少，點解架？睇真 D，原來 E2C 的 105dB 只係響 1kHz 時量度的，

呢個數據唔係反映全頻 20Hz - 20kHz 的靈敏度，唔怪之得啦。

而家，E2C 會留返響屋企，等夜晚睇戲時用。而出街，已經改用 EP-630 了。好在，而家三百蚊就止左痕，

無心再去研究 SONY 的 EX90 LU…咪住，失驚無神 SHURE 又出左隻新耳筒 E500PTH，

靈敏度 (今次應該係 20Hz - 20kHz) 係高達 119dB！勁！搞到我又…咳咳…呢隻耳筒好似要賣三千以上，與我無關。

分享完畢，各位，呢篇唔係正規試用報告，只係我吹下水有感而發，所以我特意用廣東話投稿，希望大家收貨啦。

: 全文完 :

　◆   avbuzz.com精神，人人毒我，我毒人人 ◆

　謝謝收看這篇文章，你是第 個收看這篇文章的讀者。